Mawi em em a thang thin Thal hmingthang a lo ral a, thlasik khawvawta zahmawh vei hum chunga long run thin driver-te tan nghahhlelh tur hriat a lo har talh tawh a, senhri par an chuai a, april par te pawh an til zo tawh a, khuain nawrh a lo huaihawt leh zauh thin! Ni e, chutih hunah chuan thim leh eng inri-na hmun atanga lo chawr chhuak ve nawlh mi pakhat khan University ka zu rap ve kha a ni a! August thla hi India independent thla a ni tih bakah ka nuna ka hriatreng tur thla a lo ni reng mai. Kum hnih pawh a la ral hmain 'mangtha' tih ngaiin chu hmun chu ka hnuchhawn a ngai ta si.
Class kan han kal a, mawi takin hnahsin an lo vul mawi siu siau a, inthlahrung takin kan thleng thla a, kar khat a ral erawh chuan inti MA zir angreng takin khawlai kan leng a! Weekend a lo thleng a, "University-ah chuan" kan han tithla zen a, thiante bulah a tawng pawr pawlah kan tang a, nuih hi kan ta a lo ni leh thin!
"Lehkha ringawt zir tum suh u, mihring nun zir tum rawh u," min tihna aw ri te kha bengah hian a la cham reng a, "Literature belpuiah chhum hmin che u kan tum a ni," tia thahnem ngai taka Bial zaipawl member nih pawh phal lo kan zirzirtute biang tai kha vawiinah zawng a lo tai ta lo va, an ngaihawm mang e! "A thlum, a al ei za," hi eng nge tih zawhna kan thian pakhatin, "Chini leh chi eipawlh," tia a chhan tuma kan hlim zia te, kan sir pakhatin mau chi hrang hrang min sawitir tuma kan thiannu Op-i'n, "Mautuai," a tih laite pawh kha a ngaihawm ta hle mai! Mautuai chi hrang hrang kan sawi tumin, 'tuaiterek' chiah sawi tur a hre leh si!
Napoleon-a'n indo tura a kal laiin Alpine tlangdungah hmun hla taka dar ri bel bel a hria a, a sipai zawng zawng a chawlhtir vek a, a ngaithla ta vang vang ang khan an thusawi zawng zawng kha hmun hla taka dar riin lung a tileng angin ngaihthlak nawn leh chakawm, lung tileng a chang zo ta.
Mizo MA chu, "Kawmthlanga hnahkhar khuan hnah engzat nge a neih?" tia thingtlangpain an zawh chut chut tur kan nih thu min hrilh te kha a hlimawm rualin entir nei, thu tha a lo tling a, master tih hi third division a ni lo tih min hrilh nawn leh thin a lo ni! Kan class-ah chuan thil engkim a leng a, kan sir pakhatin a fapa a naupan laiin zawng thluak a eitir thute kha tu ma hriat ve ngai loh min hrilh a ni a, a harh tak em avanga satel sa eitir leh a duh thu a sawi te kha science student ho hmaah sawi ta se ang tin tak ngai ang maw?
Kan fel lova, kan nun pawh a ropui ber a nih ka ring lo, lehkha pawh a thiam thei ber kan ni hauh lo vang. Mahse, kawng khat tal chuan hlawhtlinna hi kan nei theuhin ka hria a, chu chuan ka thinlungah hian sawi mai theih loh lawmna chi a tuh a, a thang lian zelin ka ring. Nun hmachhawn turin min fuih a, harsatna hi hman ata tawh a thleng reng thin a, a pumpelh a awm loh avangin a hmachhawn dan kan thiam a ngai a ni tih te hi kan university ngeia department dang hian an hre ve ang em..... ka hre lo. Keini chuan kan zirtirtute nun atangin a takin chu chu kan hmu a, kan experience a, kan inpui tawn a, kan intawngtaisak thin!
A tawp berah chuan, academic atan chuan regular taka class kal chu ka kalsan a lo ni ta reng mai! Mahse kan lo beisei leh kan lo nghahhlelh ang chuan vawiin pawh hi a awm chuang lo! Hna a awm mai lovang a, private-ah cheng tlemte hlawha thawh pawh a la tul ang a, MA zir hi a lo ho viau mai ti tura min ngai pawh in awm ka ring. Hna kan hmuh loh phei chuan kan tan kawng a va ping dawn em! Mahse chung zawng zawng hmachhawn dan chu hrilh kan lo ni tawh asin thiante u, buaina hi kan ta, beiseina hi kan vawiin, tih hram hramna hi kan naktuk, a thleng lo tur zawk a thlenna ram hi kan ta!
Tlang pakhat chu kan lawn chhuak ta ngei a, mahse uang tur leh inti thiama chapo mai tur pawh kan ni lo, hmabak an tih hi a neitu kan ni, kan beih hram hram lai kha kan hlawhtlin lai! A chhan chu R.L. Stevenson-a khan chuting tur atan chuan nunah hian min lo siam daih tawh asin!
"For to travel hopefully is a better thing than to arrive, and the true success is to labour."
-RL Stevenson.
A va tha tak em. Thuziah leh tawngkam hi i thiam bik teh e... Comment dan tur pawh ka thiam manglo
ReplyDelete3 Idiots film a ka duh laitak chu, "mi hmantlak ni turin zir rawh u" tih kha ani. A pawimawh hlein ka hria. Private ani emaw, sorkar ani emaw, mi hmantlak loh tamtak te kar a hmantlaka kan zirchhuak anih chuan chu chu keichuan ropuina leh hlawhtlinna ah ka ngai
A hmasain i hma lam hun zelah duhsakna ka hlan che. Hna hmu lova i awm mai mai a nih pawhin tuna i nihna kha mi tam tak nih châk a ni mêk tih hria la, hlawhchhamah inngai suh. Duhtawk rawh ka tihna erawh a ni miah lo thung. MA Mizo nih hi a neu lo, kei paw'n ka nih châk em em a ni. Tuna i nihna ang ni thei tur chuan kum 5 dawn ka zir a la ngai a. Ka nih hunah meuh chuan hna tha tak i nei tawh ngei ang a. Tuna i thil rawn sawichhuah ang hian zirna lama ka huntawn hlimawm ka sawi rualin lunglen thu ka la tlangaupui ve ngei ang.
ReplyDeleteI thuziak khi a hlimawm ngawr ngawra ziah tum ni lo mah la, a hlimawm ka ti. 'Thi leh thau pawlh' 'Mautuai' 'Tuaiterek' tih vel khi a hit lutuk!
Tih bek bek peih chhung chuan hma kan sawn zel alawm tiraw. Midum kham an laih tirh pawhin an hotupa khan, "Thirtianga in cho khan a khu telh telh em," a ti a. Inhlawh ho chuan a khuk ve tilh telh thu an hrilh chuan, an hotupa chuan, "A khuk theih chhung chu laih tur," tiin a nawr luih zara kawng pawp ta anih thu an sawi thin.
ReplyDeleteMihringah tumna a awm chuan beidawn lek2 chang awm thin mahse, a tawpah chuan hma kan sawn ve zel ania. I kal zel na turah duhsakna ka hlan a che.
Kan veng ami pawh sikul ah, "What is labour?" tih zawhna a chhuak a. Ani chuan, "Santal" tiin a chhang alawm hehehee
I thuziak hian min tihlim hle a, a lunglen thlak hle bawk. University han kal meuh hi chuan rilru leh taksa a lo puitling tawh a, kan nun a zalen tawh bawk a, a nuam asin aw. Kei pawh, lehkha ka zir chhung zawng zawngah University a ka kal lai a nuam ka ti ber.
ReplyDeleteMizoram chhungah kan pual ngeia University kan lo nei ve ta hi a lawmawm kher mai. Mirethei, thingtlang tlangval tan pawh M.A. zir ve a awlsam phah sawtin ka hria a, lehkha zir nana Zoram pawn lama pawisa tam tak kan paih chhuah chur chur kha, nasa takin kan save ta bawk.
@Cyberthug: Fak tlak ka awm lo ania. 3 Idiots kha vai film ah chuan ka ngainat pawl a ni. Tih hram hram hi a harsa a, mahse kan tihtur a ni si a nih hi!
ReplyDelete@TS Khupchong: MA (Mizo) nih hi thinlung takin ka lungawi a, ka lawm ve veng veng. Ka lo zir lovang tih ka hlau thin! Kan phutawk hna chu Pathianin mi tin tan hian a ruat ka ring. Hun te chu a kal ve zung zung mai ania, han ti tang tang rawh.
@H.Vangchhia: Midum kham vawiinah ka va kal a, an laih lai ka hre pha ve lo va, a harsat tur zia erawh va hmuh sawn a chiang thinin ka hria. Nangmah hi chhun thei che ila a tha ang!
@caribou: I tidik khawp mai, University kan nei hi thingtlang mite tan chuan thil lawmawm tak a ni. Kan lo nei lovang tih a hlauhawm thinin ka hria, min fuih zel aniang chu. Ka lawm lutuk e.