Dam lai pialral chu thih hnu khawvelah hmu theiin kan inring thin a, pialral kan ngai a, kan chhing mittui a hul thei lo fo thin a nih hi; chu chu mihring nunkhua, chatuan atana a tira dah lawk chu a ni. ‘Pialralah tal’ inti thin he mihringte khawvelah hian nun hlimthlá min hmuhtir a, ka tana chawlhna ‘hmun khawhar’ min siamsak thintu mi pakhat, ka hmangaih em em a awm a, a hming chu Didi a ni.
Hmun khawharah chuan min lo mikhual thin a, ni eng hi a eng bik a, thawnthu ngaihnawm tak aiin kan nun chu a ngaihnawm zawk a, hmuh ngai loh thian kan ni a, hmangaihna hmingchhala kan din kan khawvel zimteah chuan chawlh hi a nuam a, thlifim te hi an vawt reih asin. Didi, ngaithla teh thlifim te chuan kan lehkhabu hi an chhiar asin...
Didi, i nuna ka rawn lantirh kha thlasik khawvawh em em lai a ni a, thlasik zinkawng chu zawh dunin zan khawvawt hnuaiah hmangaihna thawnthu kan sawi a, arsi-te khawvel mawizia te kan hril a, hahdam em emin kan nui dun a nih kha. Mak takin kha kan khawvel kha midang hriatthiam theih reng reng loh turin hmanhmawh takin a intan a, khawvel ruala kal pawh duh mahila kan thei tlat lo va, khawvel aia chak hret zelin kan tlan a, mahse kan inlungrual a, kan hlim thinzia kha aw. Kan thawnthu kha zan khawvawtah, thlasik daifimte hriatpuiin kan ziak a, arsite khian an nemnghet a, zing khawvar te hian a dik a ni tih an puang asin.
Ka tan tling lova i inhriat tlatna khan vawi tam tak chu ka pianna ngaiah min kir tirin tunge ka nih ka inzawt nawn fo a, i tan hian ka tling a nih chuan ka tan i tlin lohna reng reng ka hre ngai lo. Kan lo inhre har lutuk kha a pawi hi ka ti vawng vawng thin a, zawhna chhanna awm lo hi vawi tam tak ka inzawt a, ka tel lova i hun ral ta tam tak kha ka ui thin a ni. Ka tap ngai lo ti mahla i tap thin tih ka hai lo va, hlim taka awmtir che hi kha kan inhmuh hmasak ber ni atanga ka thiltum lian ber a ni nghal a, mihring ve tho i nih avangin i khua a harin i lung a leng thin tih pawh ka ring a, i nunah hian chhimbal zamtir ka tum ngar ngar thin. I hlim nuihmel hi mawi ka tizual em em thin a, hlim taka i nui ri hi ngaihnawm bikin ka hria a, i thlalakah te pawh i nui lai te chu vawi tam ka en thin.
Mi ngaisang mai mai duh lo inti ve thin kha ka ni a. Hmeichhia dahsang duh ngai lem lo mi ka ni! Mahse ngaihsanna che ka nei, ka ngaisang che asin Didi. A chhan min zawt lo la hei vang hian a chang chuan kan buai thinin ka hria! Hlaah pawh hla mawi ber chu i tan ni se ka duh a, i tana hla ka phuahte hian ka sawi fiah zo loin ka inhre fo a, ka insit em em thin. An mawi tawk lovang tih hi ka hlau thin a, vawi tam tak ka siamtha thin asin. Didi ka tih hmasak ber tum che kha i la hria em? A thlûk kha mawi i ti vak lo va, mahse ka tan chuan Didi i ni miau a, a thlûkah ka buai lo va, i inhmeh ka ti em em a, lungsi em emin ka ko thin che a, dik tak chuan ka uang a ni. Ka nu leh pa kianga thlamuang taka ka kalsan ngam hi he khawvelah hian nangmah chauh i la ni tih hria la ka duh. Chu chuan ka ring che tih a kawk satliah lo va, ka tana i hlutna te, i pawimawhna te an hril asin.
Ka ngaihtuah thin a. Nula leh tlangval leng siau siau karah hian kan inngaina fal bik a, nun hi nuam kan tibik a, kan inringtawk a, khawvel nen kan nun chu thleng kan huam fo a, hetah tak hian kan inhmangaihna hi a chhuanawm ka tithin a, hmangaihna dik a ni tih huaisen takin ka tan ngam a ni. Hmangaihna hi ka dahsang em em a, mihringte hian kan hria a, mahse kan puitlin zo loin ka hre ve mai mai thin a, mahse nang leh keiah hian a puitling chu hmuh theihin a awm foin ka hmu a, ka lawm a, ka uang a, engmah ni lo mahila kan ropui riau hian ka hre thin. Midang tel lo pawhin nun hi kan zuam a, harsa tak pawha mihring nih hi kan huam a, kan inhmangaihnaah chuan chung chu a tel avangin khawvela mi ropui ber ni lo mah ila kan ropui ka ti a ni.
Kan ngaihnawm ka ti thin. He khawvelah hian inhmangaih tam tak an lo tlu hlum tawh a, inhmangaih tam tak an lo inthen tawh bawk a, nang leh kei hian ngaihnawm takin he hringnunah hian neitu nihna hmangaihna hmingchhalin kan nei vein ka hre thin. I kiangah chuan ka pangchang leh tlat thin a, ka hna atanga ka lo haw-a i bul ka thlen te hian ka hah ta riau te hian ka inhria a, i bulah hi chuan khawvel hi a naupang a, a hlimawm a, ka tan a lehpek khawvel a awm lo. Ka hmangaih, ka khawvel, ka nu, ka hahdamna, ka in i ni Didi. I hmangaih nih hi a nuam a, a chhuanawm a, a famkim bik a ni. Nau ang kan nuar a, chhun leh zan hi kan palzut fo va, thim leh eng hian min thunun zo lo fo thin. Kan harsatna kara kan hlimna te hi keini chauh lo chuan an tem ve dawn reng reng lo va, chuvangin kan ngaihnawm bik a, kan nunkhua hi a nuam a ni.
Thlipui te chu tlehin he kan nunkhuaah hian ruahpui vanawn te chu sur fo mah sela mawi em emin zingah ni a la chhuak leh thin ang tih ka ring a. Thlipui pawhin a tlukpui zawh loh he kan inhmangaihna in hi ding reng se la, thlifim tleh zingah chuan rimawi ngaithla ila, sirvate zai saknaah chuan nun thing thiang va din ila, khaw ropui ni loin khaw hahdam siam ila, chutah chuan i chawl ang Didi.
A tawp berah chuan ka hming i lam huna awm loh hi ka duh ngai lo va. I tan chuan ka hun pawimawh te hi an pawimawh zo lo va, eng tik hunah pawh keimahah chuan i pawimawh ber reng fo a, ka tih theih apiang tih ka tum thin. Harsatna harsa tak karah pawh i tan chuan nun ka inhuam a, i bulah chuan keimah hi ka intheihnghilh zawk thin tih i hriat kha. Ka hmangaih che tih hi i hriat tawh hnu mah ni se ka sawi nawn leh duh a, he khawvela ka awm loh hunah pawh chu chu thudik kumhlun tur a ni. Ka chanpual, ka nun hlimna hla ni reng ang che.
I mi hmangaihna chu ka nunna a ni a,
Ka thinlungah hian ka ziak a,
Chu chu ka nun khalhtu a ni,
Ka zinkawng chu i zinkawng a ni a,
Ka vangkhua chu i in a ni Didi.
Tu nunkhua mah ka awt lo,
Ka nunkhua, ka damna i ni si a,
Khawvel dang ka duh lo va,
Ka nunna, ka khawvel mawi em em,
Ka nuna thla eng awmzia chu i ni a,
Ni eng hian i fakna hla a sa thin!
Ka thinlung riahhmun remna laikhum,
Tuma hriat thiam loh thuruk,
I mawina chhimbal vangkhua,
Van te van, nunna te nunna thing chu,
Naktuk nghakin mawi takin a la vul a,
Suangtuahna suangtuah phak loh,
Chung si-ar riahrun pialral zai va!
He thinlung hi i in a ni a,
Chu in chu a inhawng reng a ni!
