Ka rilruah a awm tlat mai si a, ka han thlasik mau puah pui leh phawng phawng mai ang e. Kan veng hi chhim thlang kilah a awm a, a lo pianna chu a rei viau tawh niin rual u ten an sawi thin. Mahse, a \hang thei reng reng lo mai a, a hminga college inbang liam hi a zir sang pawl an ni tlawng mai a. Vawiin thlengin VCP-ah pawh sap\awng kawi khat a awma buai zel mai bâk kan nei hleithei lo!
Nia, kan khuaah chuan St. Pauls school te a awm ve lo va, hmân ata tawh, Pu Pachhunga sikul chhuak kan ni vek mai. Ram hi Pu Remtea in bul phuihnam chhe hmun a ni tawp a, nun hi inkawibah a ni a, Tom Sayer kan hre lo va, Pu Hmingliana te ina TV en erawh thingfak nen kan ching ve \hin. Pathianni tlai hian hindi feature film en turin thingfak nen kan intlar \hap zel! Pu Neiha sikul a lo awm tak hnu erawh chuan naupang an fai thei ta deuh a. Pu Pachhunga sikul nen an inel deuh vang a ni!
Thla en zanin Pu Biaktea, MNF returnee ngat hian zan laiah radio hi ring deuhin a running \hin a, hindi nge vai nge, Burma nge, \awng hriat loh hian zankhua hian a rak tlaivar \hak zel a! Khua a lo var a, “Engatinge nizan kha?” \henawmte’n an han tih chuan, “Seventhday ho hi alawm le,” a ti chhum bung nghut a, sawi tur hi a awm tawh \hin lo! A hre awm deuhte ka zawh chian chuan hetiang deuh hi a lo ni. Seventhday ho tlai sikulah a fanu a kaltir ve a, Bible hlawh nan tiin phur takin a tirliam a. Mahse, a fanu chu seventhday kohhranah a nu nen an lut ta daih mai a, chhungkua a buai a, an in\hen ta nuai mai a! Inkhawm lo mah se Baptist ruh em em \hin Pu Biaktea tan zan khat thil thua nupui leh fanu seventhday han ni thut kha silaia a MNF laia an kah thawi thuak aiin a tawrh a hrehawm a. Nun hi hmachhawn tur a ni tih a hre ta lo va, a khua a har \hin a lo ni awm e!
Chutiang teh nuai chu kan ni a, zanah khawlai han leng ila, nghathu rim nam hi an insul pel zut zut a, hmun \henkhatah an lo insual a. |henkhatah an lo in-dekhe bawk a. Mobile phone a lo chhuah hnu hi chuan nghathu rim chu an nam tawh lo va, mahse ring tak takin hla an play a, Lal\hakima hla ‘|ha Ainawni’ tih hian khua an suartluan a, kohhran upa ho pawhin an by-heart vek tawh an ti! Phone neih ringawt hi chu a \hing an ti a, a zai thei neih hi erawh chu nula rim nuam an tih phah \hin hle.
Mahse, thil mak deuh chu, \henawmte rel an ching viau e tih lohah chuan chawhmeh insuah te an ching a, an in len pawh a, chawhmeh inthar-tem te pawh an la ching reng. Lunglei khawpuia politics thila inhèk an hrat tehlul nen, sa kap an awm chuan forest guard ho ho hian an nui ang \he \haw a, tu mah an inhêk ngai hauh thung lo! Mahse, dan pakhat an nei a, sa kap apiangin forest guard chu sa ser hnih tal an pe ngei ngei tur a ni tih hi a ni. Inlungrual takin Pu Chawia hovin pasal\ha kalkhawmin an pass rup a, mipuiin an pawmpui em em.
Pu Sanneihthanga mawlh hi a va ngaihnawm tak! Baptist kohhran rawngbawltu(tual upa an ti Presbyterian-in) a ni a. A hun a thlen dawn chuan naupang a\anga \halai, pitar leh putar pawh an inkhawm kim vek zel! Thusawi a thiam an tih vang pawh a ni lo, a sawi nuihzatthlak em \hin vang zawk a ni. Good Friday vawi khat chu thu a sawi a, a awmzia a han hrilhfiah a, “Good chu ‘\ha’ a nia, Frai..day chu ‘zir..tawpni’ ania, ti chuan, Good Fraiday chu Zirtawpni \haaaa….,” a han tih thlûk vang vang tawh hi chuan Pi Sangthluaii(kan veng lehkhathiam ania BA(Gau) ngat!) te lai lai hi an lo nui thler leh duai duai mai \hin a. Ani lah chuan, pulpit tlang a\angin, “In awih loh chuan Pu Thanmawia(high sikul zirtirtu) pawh zawt rawh u, ka chiang ngam sak,” a han ti bêi bêi mai \hin a. Nuih hi a hranpaa hlawh chhuah a ngai reng reng lo! Amah bawk hi an kohhran upa pakhat thusawi dawn \umin a chairman a, ban hla a thlan khalh khut tawh bawk an ti!
Middle sikul kan han kal a. Pu Hrángzáwna sikul a lo ni tawh thung a! Science kan han zir a, ‘a tiha tih’ tih ringawt hi period khat lai experiment nen min han zirtir a! A sap\awng lam dan te lah hi a ang a vang em em mai lehnghal! Microbes hi, ‘mi..kraw..bes’ a han ti \ulh \ulh a, a dik bera ngaiin kan lo hmang chhunzawm ve a! “Va zak rawh u,” tihna tluk chauh a lo ni! Pu Chhunkunga lah hian ât a so va, japanhlo-te hi class room khat tlatin min dahtir a, thosi leh vaihmite nen Lalmama Virthlileng te kha kan zir a, han thiam ngaihna chai hi a lo awm lo! “In sual man a nih kha” te chu a la ti ta deuh deuh lehnghal! Khua a lo dur a, khawpui a lo ri hum hum a, a hranpa a ban dar vuak a ngai lo, hlim em emin ipte kan hnung puaka kan han tlan kawh \hin te kha aw…..khawvel hi kan ta a ni ve hliah hliah hian kan hre ve tho asin. Kha kan khua kha a lo ropui mang e!
Mahse, hetiang khuaah hian awm mah ila, kan hlim ve em em a ni!
I ziak thiam bawk a, a ngaihnawm kher mai. Nunhlui leh hmanlai min tihrechhuak vawng vawng mai.
ReplyDeleteIn khua hi khaw nuam tak a ni. Tunhma chuan ram a tha a, tlangtin mualtin thinghmun a ni deuh vekin ka hria. Ramsa leh sava an tam thin hle a. Thang kam ringawt pawhin miin sakhi te an ak puar haw leh nalh nalh thin anih kha. Kei ngei pawhin sahdal, thangchep leh vaithang kam ka uar ve hle thin.
In khuain in tihfuh loh ber chu ramngaw tha in ui lova, in thiat dar chhe hmiah hmiah hi a ni. Thinghmun ramngaw tha lutuk in neih pawh, tunah chuan thingzai thin ho leh meihawl rawh thintu te vangin a chhe zo ta. Tlang leh kawn inkara ramngaw tha tak thin pawh in tichereuva, teak hmunah te in chantir a, sava rahtlan tha tak tak te pawh in kit hmiah hmiah. A va pawi tak em.
In khua ka fak ve em em na pakhat chu political party ah a 'ruhkawl' an tam em em hi a ni. Hlawkpui miah lo pawh nise, an ruh em em hi an fakawm ve tlats.....
Hahaha.. Chhiar a nuamin i thuziak a inphaman tha khawp mai. A lemin ka lem duak duak a, nui vur vur chungin ka chhiar tluan zak mai e!
ReplyDeleteNaupan lai paltlang tawh leh sikul kal tawh theuh theuh pawh hi kan tum leh thil tawn hi kan inziahchhuah thiam hleih thei deuh mang e aw....ka ti! Kei, naupan lai chanchin tih vel hi ka ziak thiam mang reng reng lo. Thuziak i thiam khawp mai a. Han ti ve khanglang ila, i blog ka lo luh tirh atanga han chhut chuan nangmah rau rauah thuziak lamah hma i sawn tih a langchiang khawpin hria.
'Chuan, paragraph 4-naa 'in-dekhe' i tih khi ka lo la hre ngai miah lova, Mizo tawng i tihhausakna tur a nih khi ka lo ti tawp mai!
'Nangmah rau rauah hma i sawn..' ka tih khi i lo la ulh palh hlauh ang e aw..! Aia sangte kan judge ve zat zat theite hi literature hlêp a nia! :-)
ReplyDeleteNgaihnawm hle mai tak a!!
ReplyDeleteCaribou angin in khua ka hre lo va, mahse thingtlang chhuak ve tho ka nia, mak tiin ka thlir lova, 'a va ni tak' ti hlirin ka khat.
A dang han ti leh teh.
A van han ngaihnawm mai mai ve aw!!! ka khi vur vur thei alawm le, a filim in (film) han en ila, vawi li vawi nga ka en peih ngei ang!!! thuziah i thiam in a ngaihnawm khawp mai,...
ReplyDeletecaribou: I sawi dik khawp mai, ramngaw humhalh lamah hi chuan hnufual lehzual tak kan ni. I comment thui a, a ngaihnawm tho sia. Ka lawm lutuk.
ReplyDeleteTs: I lo lenglut thin hi ka lungawi phah ve lutuk ania. Thuziak hi a har a, keimah pawh tunlai chu ka inenlet zauh zauh thin! sel ka ngaihna lai tam tak a awm ka ring, inthlahrung lovin sawi zel rawh aw.
Rp: I va tilawmawm thin, i buai ve dawn tehlul nen. A tam zawk khi chu ka phuahchawp ve bawk a nih khi! Kan la chhunzawm leh dawn nia..hehe
Hmelthatea: I lo lenglut chu a tihzia hle mai. Ngaihnawm deuha thuziak hi a har ka ti khawp mai. Ka lawm lutuk e. Lo leng ziah thin ang che.
Keini ang thingtlanga pianga seilian tan chuan mitthla pawhin kan lo hmu ve uarh uarh thei a lawm mawle.
ReplyDeleteI ziak thiam hle mai, thil niawm tak tak nuihzatthlak tak si i zeh tel te khian a tihlimawm zual. Nui sungin kan chhiar mai alawm mawle :-)
triplestar: I tilawmawm hle mai, i lo leng a. Keini chu kan nau deuh a, hei aia ngaihnawm hian nangni chuan in ziah theih ka ring. La ziak ve nghe nghe la. Ka chhiar chak khawp thingtlang nun hi...
ReplyDelete