A ngawi reng a, thu a sawi si. A reh poh leh a ngaihawm a, min biakin ka thlahlel tulh tulh a, min hua se ka duh a, mahse a ni si lo! Huat tlak lek mihring nih hi a ropui chu ka ti lo, mahse felna hi a leitu ka nih ka hre lo va, pekin ka awm a, ka hloh leh a, ka nun khalhtu atan lunglenna ka hmang a, manganna leh thawpikna chu a tawpa ka chan a ni thin. Vui ka duh lo va, chantawka lungawi hi kan tihtur a ni ka tih ka tih tawh chinah erawh chuan ka chantawka lungawi hi a zira zir fé a lo ngai tak tak tawh a, ka dinhmun a lo hniam êm êm tawh thin!
Zing eng timawi turin dai a lo tla a, thlifim a lo thaw fim heuh heuh a, a timawi zual turin zing sava an lo hram ang chiah chiah a, han hawi deuh ila, khawi laiah emaw chuan tiau chhum a lo zám pan den den a, naupang inkhel hlìm takin nun hi a hlím a, za lo mah se nuih hi kan ta a ni. Ni a lo tlangsáng a, khawvel hi a letling aniang tih turin a her vir leh muai muai thin a, tual thahna a lo awm a, nunaú an thi a, pawisawilote’n vankai chaw an bár a, mahse ani chu a ngawi reng a!
Hlim takin nula leh tlangval an lengho dial dial a, a thente chu inngeih awm takin an inkai a, insi rial hian an kal a. A then an infiam pah a, nui ri hawm hawm te pawh hriattur a awm. Khawvel hi an tan a hlimawm a, natna hi nimin a ni a, an tan chuan nun hi a vawiin hliah hliah a, harsatna hi hmachhawn a phurawm bikin an hria a, pangparte an inthliah a, an tawn vel a, hlim takin an awm a ni.
Chu`ng thil hlimawm leh duhawm tak takte pawh chu kumhlun tur an ni lo va, mahse tun huna hlim hi nimina lungngaih ai chuan a va tha si em! Hun a lo kal a, inngeih taka kut suih riala an lènna phul hmunah ngei chuan anmahnia anmahni chauhin lunghnur tak leh beidawng inti em emin tlai ni tla thlirin an kut tukhuma suihin an tap vawng vawng leh si thin! An bàn pháka hlimna a rawn kùr hniam lai khan ngaihtuah tel loh pakhat an lo nei thin, chu chu mihring hi amah chauhin a lo piang chhuak a ni tih hi! Thlirtu chuan a thlir reng a, heng zawng zawngah hian hmu lo leh hre lo ang maiin a ngawi reng a!
Biak In bulah mawi takin kumtluang pâr a vul a, chu hmuna kal thin naupangte chuan an thliak a, mawi an tih vang pawh a ni chiah lo, mahse an hlimpui a, an hmuite’n an han fawp vel a. Biak In tualah chuan ngaih ngam takin an khawvel hlimawm tak chu an hmang a. Phengphehlep a lo thlawk a, an han um leh rih thin te chu an nu leh pa tan chuan a aia hmuhnawm thil dang a awm chuang lo.
Kumtluang pâr hmunah chuan chhungkua hi an inhmukhawm a, ‘fa’ hlimnaah chuan nu leh pa lungawina a awm a, ngawi reng mah se chu kumtluang pâr chuan thu tam tak a sawi thin. Mahse chu kumtluang pâr meuh pawh chuan damchhung a daih lo va, naupang lo puitlin hunah chuan a kung takngial pawh hmuh tur a awm tawh thin lo! Kumtluang pâr meuh pawh an chuai thinna ramah hian chuailo par pawh a chuai thin! Mahse an hun lai erawh chuan mawi takin an vul asin zirtirtu.
Thlirtu chu Pathian a ni dawn emaw ka lo tih nakalaiin, kumtluang par alo ni maw? kumtluang par meuh pawh an chuai thinna ramah hian chuailo par pawh a chuai thin tih lai tak khi a va mawi em!!!
ReplyDeleteThu i thiam thin teh e
Ni e, "Mihring chauh lo chu zirtir an ngailo," tih naupan laia kan sak thin ang kha ani ber awm e.
ReplyDelete#CyberThug: A lawmawm e, i comment hmasa ber! Thlirtu hi chu a chhiartu ngaih dan dan a ni mai ang chu.
ReplyDelete#H. Vangchhia: Min lo tlawh thin hi ka lawm takzet. I chanchin hi hostel a ka awmpui la naupang ve leh deuhte fuih nan ka hmang thin. Nia, mihring nih hi a ropui a, mahse min siamtu duh dan pela nun erawh a ropui lo thin a nih hi...
‘fa’ hlimnaah chuan nu leh pa lungawina a awm a
ReplyDeleteHelai thu hi kei, a taka tawng tawh hian ka va han hrechiang tak em. (Nang chuan a theory maiin i la re si a... he he he). Fate hlimna chu kan hlimna a ni a, an lungngaihna pawh kan lungngaihna a ni thin si a.
Kei pawl 12 thleng chauh Mizotawng zir hi, nangni ang kiangah thu leh hla chhete te ka lo vawrh ve thin a, ka han ngaihtuah let hian, Sai padawp hmaa chhimtir tualchai ang lek niin ka inhmu thin.
caribou: Naupang tuihawk khuap hlim taka nun hi a hlim chuan eng dang vak hi kan ngaiin ka ring lo thin. Fa neih ve te hi a chang chuan ka chak phah thin, naupang duhawm tak ka hmuh hian. Chutia insitna thu ni dawn dawn te i chhak chhuah tak, a kung ni la, kei a zar pakhatah ka lo tang zawk ang.
ReplyDeleteA va ril em ve aw.. I thuziak apiangah lunglènna thu ka hmu ziah a. Chuta i lung tilêngtu pawh nature a ni deuh zêl bawk. Thu dangah i'n pakai të të a, a thumal tâwp berah he thuziak khaidingtu, a bulpui ber chu a lang chauh. (A dik em aw!) Chu chiah chu a lang lehnghal! A thu ka chhiar laiin eng i sawina nge ni ang aw ka ti rilru a, a punchline-in a rawn hrilhfiah ta vek e. I thuziak comment tak tak turin ka tawngkam thiamin a daih lo! A ril lutuk tlat.
ReplyDeleteTS: I comment chhiar hi a nuam thin. Tunlai chu exam hnai viau e ti lo hian ka lung a leng tlat thin a! Kei aiin thuziak chu i thiam zawk ang. Heta ka post ho tete bak hi thildang phei chu ka nei hran lo. Eng pawh chu ni se, ka lawm e..
ReplyDelete