He thumal ‘midang tan’ tih hi kan ngaihtuah chiang ngai em aw. Kristianna laimu hi eng nge tih inzawt dawn ta ila, a tlar hmasa pawla tlar tur a nih a rinawm. A hmasa berah pawh thu se a chapo kan tithei hauh lo vang. Daniala 5:17-ah tihian kan hmu, “I thupek chu nangma tan ni sela, I lawmman chu midang pe ang che,” tiin.
He kan khawvel hman mêka mi tam ber hi chuan midang tana nun hi kan ni tin thunawn a ni pha meuh lo; ropui kan duh a, a ram leh a felna aiin sum kan zawng a, hneh theih loh nun neih kan duh a, midang hnuaichhiahna hi hnehtu nihna emaw kan ti thin. He khawvel hi kan kumhlunna tur emaw kan ti a, kumtluang par meuh pawh a chuai thin tih kan hre si lo. Nun hi nuam kan ti a, Pathian ni zinga sa tui hâng kan hawp theih chhûng chu ka theih tak emaw tiin kan insuih ti ti ik a, thenawmpa pheikhawk bun man tlawm zia kan seprawtui zui mai thin! Lal Isua kha midang tan a inpek avangin ropui taka khawvel ngamtu a ni tih kan ngaihtuah ngai em? He hla siamtu hi mi vannei a lo ni, tlar hnih lekin a sawi kim vek mai!
“A tâna lungngai a ni lo,
Ka tan a thisen a far.”
Mahni ropuina tura thi ni lovin nang leh kei hian nuih hi eng nge tih te kan lo hriat ve a, chhandamna hi khawi lai ruamah emaw ni lovin kalvari tlangah a awm tih kan lo hriat nan te, neih aia neih loh ngah zawk hian vanram ticket kan lo neih ve theih nan te inngaitlawm takin lei leh van lal ber ni mah se kraws lerah khan a lo thi a ni.
Mizote chu thian chhan thih ngam hnam kan ni kan inti a, he khawvelah hian tlem viau mah ila kan uang thin a nih hi! Mahse thiante tan chauh ni lo, misual leh mi awm tha duh lo, rukru leh mahni inhralh te, tualthat leh uire ching te, he pawnchhe hnang khai khawvela puanchhia pawh ni pha tawh lo zawng zawngte pawh hmangaiha kan tana thi duh Pathian kan nei hi kristiante hi he universe-ah hian a vannei ber kan ni mai awm asin. Kan vanneihna hi thilthlawnpek a nih avangin a thlawn bawkin kan pe chhuak ve tur a ni dawn lawm ni. Kan thilthlawnpek dawn hi ngun takin chhiar ila, lak aiin pekin lukhawng a nei zawk tih thu hi kan nun lehkhabuah i ziak nawn leh ang u.
Lei lawmman hlu tak tak kan dawng thin, he inelna khawvelah hian a hlutzia kan hriatna te hi chu sawi lohva lêng pawh ni lovin sawi lohva thlâwk a ni. Mahse Lal Isua khan eng award mah a dawn kan hre lo va, a chipuite ngeiin an deusawh lai pawh khan uirenu chhanchhuah theihna thu ropui a ziak thei tho va, mihring a nih ve chhunga a thu ziak awm chhun a, ‘sualna nei lo chuan’ a tihah hian nang leh kei hi ngawi rengin kan lo tel ve asin. Midangten malsawmna an dawn theih nan kan thupek chu keimahni tan ni se la, kan lawmman chu midangte i pe ang u, “nang malsawmna ni ang che,” tih thu hi a la pangngai reng si a.
"Midang tan" tih hian inpekna vawrtawpa inpumpekna a kawk. Mahni tana inhaivur hi mihring zia a ni a, kan zui ber Lal Isua erawh midangte tana inpe ral thak a ni thung si.
ReplyDeleteI reh vung vung a, i rawn lan leh meuh hi chuan thuziak tha tak tak min rawn hlui leh thin anih hi.
@caribou: I tilawmawm thin e.
ReplyDeleteRegular hi ka tum ve deuh thin a, ka tlin leh meuh thin lo. Kan exam tep tawh a, kan zawh hunah chuan ka regular ve thei deuh tawh mahna.
Ka'n ti daih teh ang. Dolerich hi kawm chian che ka châk ngawt mai. Mizo tawng i thiam si a, literature-ah i tui bawk si a. I thuziak apiangah he i nihna hi ka hmu ziah! A tha ka ti khawp mai.
ReplyDelete@TS Khupchong: Ka tluk loh val i niin ka hria. Mi i fakdernaah ka lawm lutuk e.
ReplyDeleteHe khawvel hi ka'n phak tawk theuhah hian kan buan theuh a, a chaklo zawk nih hi hnehtu nihna a nih chang a awm thinin ka hria. Keipaw'n ka kawm chak lutuk che.