Friday, April 22, 2011

Kan thawnthu.



      Amah chu mi vantlang pangngai a ni a, mite aiin a hleitlingin a ropui hran lo, mahse ani chu ani a ni. He hringnun zinkawngah hian ka nun khalhtu ka nih chhung hian a hmêl pawh vawikhat chiah ka la hmu! Mahse ka tan chuan a aia Dorothy leh chuang dang hi an awm chuang lo.

    A pa chu pastor a ni a, ka pa ve thung erawh chu kohhran upa, a nu chu lehkhathiam, ka ngaihsan êm êm a ni a, ka nu chu ka nu a ni. A naupan tet lai atangin uluk taka enkawl a ni a, keiin perhpawng ka laih laiin ani chuan o..n..e..one a lo ti lauh lauh tawh a, kahthek hmanga kan indo laiin Tom Sawyer a lo atchilh daih tawh. Hmeichhiaah chuan amah ang hi an tam ka ring lo. Mahse inanna pakhat kan nei! Kan inngai thin, hmanlai inngai ka sawi lo va, lungleng taka awmin kan inthlahlel a, hmun hrana awm chungin hmun khatah kan hlim dun em em thin. Mahse, kan inthen! Chu chu a ni ‘kan thawnthu’ chu.

     A hming pawha ko phal lovin ‘ka nau’ tiin ka ko thin a, a nuin duh taka a phuah ‘maria’ tih chu ka ni tin ngaihtuah a ni. Zan khat chu, “Lo leng rawh," a tih tlat avangin ka va leng a. Chu chu a ni he leikum chhiar a, chakna avanga kum sawmriat kan dam theihna khawvela kum sawmriat thlen min tihuphurh tu chu. A nu hriatpui thlapin kan inkawm a, a biangsum lang fiah kelh mai hmachhawn chunga min han nuih lai te khan thli hi a thaw nge thaw lo tih pawh hre lovin ka ngaihtuahnaah ka cheng a. Zakzum angreng tak a ni a, kei aiin a naupang na a, a ngaihtuahna chu ka um a ngaih chang a awm. A chang erawh chuan naupang duhawm tak hi a ni a, thil min dil se a petu nih chu ka chanvo ni reng se ka duh thinin ka ring. A ngaihawm tih hi a bula ka awm lai ngei ngei pawh khan he ka chhia leh tha hriatna hi hrilhin a awm tawh a, a tel lova nun hman huphurhawm tur zia nen lam ka mitthla nghal vekin ka hria! Chu chu a ni ka nau chu.

    Ka thianpain a sawi ka hre reng thin. Nula a bem dawnin Sialton Official thawnthua, “D, if you could see my heart, it is bleeding now,” tih hi tuah takin a sawi thin a, tichuan kawng zau taka hawnin a awm thin a ni awm e! Chu thu chu ka sawi ve a ngaiin ka hre lo va, a thawnthu zawk erawh chu a ngai ngaiin ka hrilh a, ngun takin a ngaithla a, kan han chawl a, ka’n nui leh rih thin.


 “Dorothy min ti rawh," a tih lai te chuan duh thawh lutuk tih hriat ngawih ngawih hian, “Ka Dorothy duhtak," ka han ti ve vel a, thla eng hnuaiah kher lo pawh hian nun hi a lo ngaihnawm thei a ni tih te pawh hi kha kan thawnthuah khan a tel a ni. A duh dan a nih loh chuan min hnial mai a, rilru sual an tih ang leh ngaihdan tha lo an tih ang hi amahah khan hmuh tur a awm lo, a ngaihdan a nih loh chuan a nuar thiam a, a ngaihdan chuan leilung hi a nu siam emaw tih chang nei ni awm tak....luhlul, ngaihawm si a ni!

     Mahse, harsatna harsa tak kan inkarah chuan a awm a. Theih loh tih hi midang nunah ka lo nembel tawh thin a, ka nunah hian he thumal hi rorel tir ka tum ngai lo. Neih aia neih loh ka ngah zawk miau avangin chu harsatna harsa em em mai sukiang tur erawh chuan ka chaknate hian thahrui an nei lo va, a tuartu chu kei leh ka nau chu kan ni ta a ni.


      A chinfel dan kan ngaihtuah ngial a, kan pahniha kan ngaihtuah pawhin a fel thei lo va, a hnua keimah chauha ka ngaihtuah leh pawhin a fel thei chuang lo. Khawvelah hian Indopui te meuh pawh chinfel a ni a, thlipui tleh hlen ta a awm pawh kan la hre lo. Ruah a sur pawhin a bang leh thin, mahse he harsatna hi chuan siamthat a duh a, mahse a hmanrua kan neih hi a chau em atin ni. “Vawikhat mah rawn leng tawh suh. Ka haw ngawih ngawih che,” tih te hi a zan hnihna a ka message dawn a rawn ni chho va, "Ka na dawn tih i hre sa reng a, mahse dan i tum lo, ka hua che," tihin a zui a. Chhan ngaihna reng reng ka hre lo. Fanghmir kawchhung induan dan ka hre lo va, chawngzawng ke pen chelhdingtu hi a awm tih ka lo ngaihtuah ngai lo a ni ka nau.     
                            
     Ka nau, vut aiah pangparthi te, tah aiah nuih te, lungngaih aiah hlim te, mangan aiah lungawina te hi a phû hnenah chuan zah takin ka hlan a, lungawina kianga hlimna luipui luang ri hum hum sira hahdamna hlimah chuan chawl la, tahna zára nuihna fangkhat chu i tan lo ni thin rawh se. Nangmah leh nangmah inbum i tum a, min kalsan thei emaw i inti a, mahse i thinlung hmun khawi emaw laiah khan bu ka khuar tih i hre si lo tiraw. Ni lo, i hre leh si a nih kha, a ngai ngai hian a ngaihnawm ka ti, vawi tam tak ka chhiar tawh hnu mah ni se, a ngai ang ang hian ka ziak leh mai teh ang, "Mahs, hei hy k chah duh ce, nupui i neiha, kei phn pasal k neih hnu ph nise, i kum te lo upa in emw, taksa borhsom tk, natna emo ph lo tokla..Kan in hi i hria a, i hun tawpah tal cn, i kut vuanin...Nag fawpin ka rn thlah liam ag c, k aia i liam hmasa anh cn...Pathian phn mn hretyam em ag cu! hria m,” ka hria asin ka nau, Pathian hi i lamah tangin chu hun chu i duhthusam ang ngeiin a thlentir ang tih ka beisei.

     Eng tikah emaw chuan thlifim a thaw leh heuh heuh ang a, sava an thlawk leh lêp lêp ang a, chawngzawng ke pen takngial pawh hi a la ding leh thin ang. Khua a lo thal ang a, tuahpui leh vaú an lo vul leh ang a, thanghniang, chu tih hunah chuan i tel ve dawn si lo! April pâr pawl a lo pâr ang a, nun hi a ngaihnawm thar leh thin dawn asin.
      
    Tichuan, nun hi a hlimawm i tih chang te chuan min lo hre ve thin la, kum a lo vei ang a, ‘Never Alone’ tih hla ka ngaihthlak apianga ka lo hre chhuak ziah thin dawn che ang hian a thianghlimnate nena April par pawl lo par vul chik chêk i hmuh apiangin min lo hre chhuak ve thin dawn nia.


    Hmun hla takah awm mah la, i kiangah ka awm reng thin tih theihnghilh lo la, ka hmuh phák loh vah, ram hla takah i la kal pawh a ni thei, kan inthen avang mai hian ka mangthaah che ngai suh. Ngawi rengin ka zui reng thin ang che, harsatna i tawh hun a lo la thleng ang a, i la mangang mai thei, a chhan chu thlipui tleh thin hi a tleh tawh ngai dawn lo tih ka tiam thei lo che tih ka hrilh tawh che kha. Mahse lungngai suh, i miitui te chu i hlimna vang zawk a lo la ni ang a, hah taka i lo haw hunah he leilung leh a siamtu hian lawm takin an lo la hmuak dawn che asin. Harsatnate chuan hnuchhawn che se la, an tihtur hriain angelte chuan veng che rawh se. Tichuan, chu tih hunah chuan kan thawnthu hi a bul atangin kan tan tha leh dawn nia.
I'll be in every beat of your heart
When you face the unknown
Wherever you fly
This isn't goodbye
My love will follow you stay with you
Baby you're never alone.








14 comments:

  1. I heart chu a bleed velo a ni maw hehehe. Mi thenkhat chuan "You make my heart skip a beat" te an tia. Lungleng khua lehkhathiam hoin chumi thu awmna country hla an ngaithla chu, "Skip a beat" ah an buai ta tlat mai a, an hmuhnawm hle. :)

    I ziak ngaihnawm khawp mai.

    ReplyDelete
  2. A ngaihnawm khawp mai. Word han play velah chuan kan tluk rual i ni lo.

    Thu ziah hi a har a, ngaihnawm tur phei chuan beih fe a ngai thin a, nang zawng i thiam e.

    ReplyDelete
  3. Chhiar a nuam hle mai. Han ti zel rawh aw.

    ...khrum

    ReplyDelete
  4. A thu chu a dam dap mai a, chhiar pawhin a kal per per mai.

    In harsatna thlipui tawn chu engang tak ni ang maw. A rawn message ah khi chuan nangma thiamloh a ang ka ti

    ReplyDelete
  5. Tawngkam bungrua hrang hrang i ngah a, chu ai mah chuan a chheh kual vel i thiam zia hi a ropui ka ti khawp mai. I nula bem vel dan tur ka suangtuah chhin a, nula tana lo hnial-khan ve tur zawng zawng i tlawh chim sak vek ang a, chutah i tawngkam thlum zawng zawngin i han hung phui hmak ang a. I hnena tluk luh mai loh chu nula tan tih ve tur a awm lovang.

    Tak tak a... a ngaihnawm khawp mai. A ngaihnawm piah lamah, a ril hle bawk.

    ReplyDelete
  6. Thuziak i thiam khawp mai. Tluk loh rim i nam thin. Mahse, a hawrawp hi ka chhiar pha hleithei der lo nia!

    ReplyDelete
  7. A vai hian ka khaikhawm mai ang e. Based on true story tih ka ziak tel lo ania! Tam tak chuan an ti tel kher zel a!

    Keia thziak tlawm takte mi in lo comment sak liam liam hian phurna nasa tak ka neih belh thin a, in chungah hian ka lawm em em thin a ni.

    Harsatna harsa tak hi problem tih te, adversity tih te hian a sawifiah zovin ka ring lo! Hmangaihna hi dan theih a ni reng em? tih te thleng hian kan inzawh a ngai thinin ka hria.

    He thu hi thiante nena kan thawnthu tawiho lehkhabua dah tur zingah ka dah a, sawisel ngai in tih chuan min sawisel sak dawn nia. Tin, hemi bak hi tlem a la awm bawk!

    A tawp berah chuan ka lawm takzet zet e.

    ReplyDelete
  8. I thuziak ka vawikhat chhiarna a ni hial maithei. A ngaihnawm thlawt e. Word play pawh i hnehsawh a, a lungrun tawk chiaha han sawi nawn pawh i thiam khawp mai. Hetiang tur hi chuan 'tum luih' a theih mang loh, thinlung chhungrila turtu leh chiahtu a awm loh chuan i thu tawp lam chhuan chhawrdawh chhoh dan hi tih mai mai rual a ni lo.

    Thuziak sei vak lova tawngkam ngai emaw, entirna emaw hman nawn hian mit a tikham duh niin ka hria. Ziak zawm leh zawm loh tur chungchangah hian 'chuti tur chu a ni,' han tih fak fak hleih theih ni lo mahse, a tlangpuia kan zawm hi chu a awm tih hre tel chunga thuziak hi a ngaihnawmin chhiar a hahdam lehzual bawk.

    Ziak zel rawh. Kan lo chhiar zel ang. :)

    ReplyDelete
  9. #Zaia: I tilawmawm hle mai, ka thuziak tlawm tak hi min lo chhiarsak tih ka hria a, ka lawm takzet e.
    Nia, ziah zawm leh zawm loh hi chu ka phak tawk chuan ka fimkhur vein ka hria. Duhthusam erawh a har thin a nih hi. Tin, tuna ka post bik hi type setting hi a fuh hlei thei lo va, ka titha peih ta lo bawk atin ni!

    ReplyDelete
  10. This comment has been removed by a blog administrator.

    ReplyDelete
  11. Thiana, a ngaihnawm hle mai. Nang hi chu ka inzirna hnar ber hi i ni ve a, i chungah hian lawmthu sawi tur hian lawm lohna ka neih pawh ka hre chuang lova, ka sawi loh pawhin ka lawm em em tih i lo hre dawn nia. Eng pawh ni se, 'ka heart' a ni emaw 'i heart' a ni emaw a bleed ve ve tawh tho kha ti raw??? Keini aiin 'AN NI' phei chu a bleed na sa lehzual zawk a ni lo'm ni? Khawngaihthlak hlawm chuan. Khawngaihna hi nei lo lek ila tha tur a nia. Nunkhua a tibuai tlat... Tha lutuk!!!

    ReplyDelete
  12. Thianpa, min lo tlawh ve zauh zauh thin la tha ang. A lawmawm lutuk e. Lehkhabua a chhuah hun a nghahhlelhawm khawp mai.

    ReplyDelete