Lei Mawina - I

(A sei deuh avangin vawi hnih chhuah atan he thu hi ka rawn ti ve leh rawih mai. Pu Rokunga hla thlirna, critical lam ni lovin appreciation a ni tih kan hre dawn nia.) 

He khawvel, tah leh nuih inelna ramah hian harsatna nasa tak tak a lo thleng tawh thin a, leilung hi a chhia a, a ruak a, khua hi dur a, ruah a sur a, nun hi a khawhar a, nuih hi bawngtuthlawha laih chhuah tur niawm takin hmun hla takah a pil bo va, nuin sawi tur an haihchham a, pa lu a hai a, an thurin hming chhalin an Pathian hnenah chuan dilna vawi duai lo he lei mihringte hian an lo thlen tawh thin. William Butler Yeats-a’n a fanu tan chu khawvel ro leh rumnaa khat chu hmachhawn ngawt ngam chi niin a hre lova, mangang takin tihian a tawngtai a nih kha,

                        “Once more the storm is howling, and half hid

                        Under this cradle-hood and coverlid

                        My child sleeps on. There is no obstacle….”

tiin, pumpelhna awm lo harsatna khawvel chu tah leh rumna hmun a ni tiin min lo hrilh tawh a. Mahse a hmuthiam Pu Rokunga chuan, hrilhfiah leh chuan ngai reng reng lovin,

Aw lei mawina thinlai tihlimtu,

Zantiang chhawrthla leh si-ar eng mawi,

Aw, zing eng mawi leh tlaitla eng mawi,

Damlai khuavel nunkhua ti nuama’n lo vul rawh.

 a lo ti dep dep mai thung a. A thlirtu azirin leilung hi a lan dan a lo danglam thin a lo ni.

            A hmu thiam tan chuan thim khuh phâk bâk chiahah hian eng a awm zel thin a ni tih thu te hi hmân hmânah khan lo by-heart tawh ni ila he hla hlutzia hre lo hian nimin thleng khan vut aiah parthi ka awrh lo tur hi ania. Zikpuii pa chuan Zozàm pâr-ah khan he lei mawi hnena hla mawi tak petu chu thilsiam a nihzia thiam takin min lo hrilh tawh a,

             “Zalam thuamah zawldi thuai nan,

            I mawi chuang e vâl tawna’n,

            Turni a liam tukram chul a lo chanin,

            Zozam a pâr hmânah di thuaina,”

tiin hringnun kalh tikimtu, nula tlangval inkara an thinlung chahbi kawltu chu he Zozam par hi a ni tih min lo hrilh daih tawh. Turnipui sa zet mai hmachhawna thlan sa phul kaia nilênga sirsáwn mizo tlangval hah tidamtu chu a di chhawlthuaina zozàm par hi a lo ni a, hringnun tuar tui ang a lo nem thin a lo ni. Dam hlutzia hre tur chuan nat a ngai a, nuih hlimawmzia hre tur chuan tah a ngai ve fo thin. Hlimna sang ber chu buaina sang ber kârah tho hian a awm an ti. A siamtu siam chhan hria chuan chu ropuina fak hla chu ngaihnawm takin he khawvelah hian an sa thin. Chu nun chu kan mihuai pahnih hian an lo sin ve ve a lo ni.

Kum zabi pakhatna bawr velah daih tawh khan Pu Rokunga hian unau a lo nei tawh asin. A tarmit bun ang bun ve Chinese poet Li Po chuan, Mizo an lo piang ang tih pawh khawvelin a la hriat hmâ khan he leilung hi ngawi reng mah se thusawitu ropui tak a ni tih a lo hre tawh,

“We never tire of looking at each other -

Only the mountain and I,”

 ti meuhin chu leilung thiltihtheihna chu a lo au pui tawh a, he mit hi mit ropui a ni. Tunlai khawvelah mit hrisel loh hlauin tarmit kan bun a, lens te kan vuah a, mahse a pawimawh ber lei mawina kan hmuh hmaih leh si! A siamtu thlirna tláng atanga thlir theihna mit vannei nei Pu Rokunga tan chuan he leilung hi a mawi a, a thlir thin a, kumtluang par leh chuailo par chuaina ramah hian mawi takin derhken leh ainawn an vul ve tho a ni tih a hria a. Kum sawmsarih, chakna avanga kum sawmriat chauh dam tur he mihring thawnthu hi tawi a ti a, a vul hun reilo lutuk chu eng vang nge tih zawng a hre lo, mahse a vul rei lo a ni tih chu a thurolum a ni a, a theihnghilh ngai lo, a dâwn thin a, pãmhmai a va’n ti em!

Aw khawvel puan anga chul tur hi,

Tin kim dawnin han thlir ila;

Aw hringnun par anga vul thin hi,

Hma te’n zamual a liam tur chu.

           

            Thawnthu tingaihnawmtu ber chu mihring nuna harsatna thleng thin a tarlan dan leh a hmachhawn dan hi a ni thin. Hlaah pawh hian a tingaihnawmtu chu thiam taka hringnun khawvel lo lang leh fiah taka kan nuna chu thil an nem kaina chu a ni thin. Mi tam takin an hmuh ni tin thin, tlang leh luipui luang ri hum hum te, a lo kalna lam pawh hriat ni lova thli a thaw leh ringawt thin te, van dum pawl ruih maia chhum zingte chuan nun hi an tingaihnawm a ni tih Pu Rokunga chu an hrilh a, chu’ng thilte chuan he khawvel, amaha awm lungawi ve reng ringawt hi hla mawi an lo pe a ni tih a han hmuchhuak a nih chu.

Tlangsang thing zar mawi leh phai zawl a,

Suang lungpui leh luipui luang ri;

Vanrang chhum leh thlifim leng velin,

Khawvel mawi hi hla mawi an pe.

Archimedes-a kha, a thil hmuhchhuah avangin “Eureka” tiin a auchhuak a, saruakin bualin atangin khawlaiah a sapatal a ni tih kan hria a. Pu Rokunga hi he a thil hmuhchhuah avang hian khawlaiah a au ve lo na a, a au zawk Archimedes-a aia a hniam bikna hi he leilung danah hian a tehtu azirin chawh chhuah a har ngawt ta ve ang.......