Ar a khuang leh ta!

Ka la hre reng mai. Zing dar li a lo ri tawh a, ka phone chu charger connect chungin ka hum ran a, a lum deuh vet vet tawh a, darkar ruk liam taa ka biak kha tunah pawh hian ka la bia a, sawi tur lah chu a zo thei der si lo! Tichuan ar a lo khuang ta al al mai a, kan kawmchhak te ar khuang ri chu ral lehlam hla tak atang pawhin a lo hriat theih a, "E khai! Ar a khuang," kan ti rual thawt a. Sana ka en a, zing dar li a lo ni reng tawh chu niin!
MCS exam tumin kan inbuatsaih ve ve a, lehkha hi kei aiin a zir rei thin a, zing dar hnih a thlen chang hi a tam em em a. Mu hma ve deuh tura ka tih pawhin a lo tih than tawh avangin a sim thei der si lo. Night pack te a lo awm a, sawmpakhat atanga kan inbiak tak fo chhan zawng sawi loh hian a chiang zawk a ni! 
Tum khat chu chhunah hian message min lo thawn teh tlat a, "Ka lung a leng ngai lo," tithin mah se a lung a leng a nih ka ring deuh tlat a. Reply ta lo chuan ka be ta zawk a, a hlim hle niin ka hria a, a relax thu min hrilh a, keini class kan lo la chawl ve si lova, ni tina inhmu thin kan han inhmu ta lo chu a khua te pawh kei ang thovin a har ve deuh a ni maithei! Nidangah chuan class kan kal ve ve thin bawk avangin message hi chhun lamah kan inthawn ngai meuh lo a ni. Vawiin zet chu ka tan chuan ni pangpar a ni, a lung ka tileng miau a, ka tan chuan ni e, ni pangpar a ni!
Mahse, hemi hnu hian a ngawi ta daih mai. Ka hriatthiamnate hian an hrethiam thei lo va, biak ka tum lahin a pickup duh lo va, message ka thawn lahin min chhang ngai ta reng reng lo! Min hre chhuak ta  a nih hi ka ti a. Ka tlinlohna te, ka sual thiamzia te, ka retheihzia te zawng zawng a hria a, ka nihphungah chhuan tur engmah ka nei si lo va. Ni e, chu chu ka nihna diktak a ni, neih ai hian neih loh hi ka ngah zawk miau atin ni! Mahse ani pawh hian hriatloh pakhat a nei! Chu chu a laka ka rilru chu a thianghlim em em a ni tih hi. He hringnun kawng kawiah hian khawi lai hmun nge ka inkhalh thlen dawn tih zawng ka hre lo na a, chu hmun ka thlen hun chuan ka kiangah awm vein ka rualin thleng se tih hi ka duhthusam a ni si.
A ngawih reng chuan ka ngawih theihna hian ram a chhuak lo va, a tawmim zawkah tangin ka huaisenna zawk hi sa pel turin a kal thin. Mahse chhuanlam pakhat chiah ka nei. Chu chu 'ka theihnghilh thei lo' tih chauh hi a ni. A zan thumnaah chuan, "Ka theihnghilh chuang si lo che a, mangtha muttui le," tih zawng hi ka thawn leh hram a! A tukzing ka thawh a, ka phone ka en chuan message pakhat a lo awm a, Dy message a ni tih ka hmuh hrual rualin ka hawng nghal a, "Ka dam tha lo va, ka khua a sik deuh reng a, exam a hnai tawh bawk nen min lo tawngtaipui dawn nia, mangtha tha le," tihzawng hi a lo awm a! A ngawih chhung zawng khan a lo damlo a nih chu! Ka inthiam lo va, tlai lamah chuan ka va be leh ta nge nge a, a aw chu a zangkhai lutuk lo va, a dam loh thu te chu a sawi a, mahse min biak hi chuan hlim takin min be lui hram hram thin niin ka hria. Tichuan, a tawi zawngin ngaihdam ka ni a, ka khawvel chu a pangngai tein he hringnun thlalerah hian a lo vul leh ta a ni.
Ka la theihnghilh lo, kha mi tum kha chuan a dam lo va, a khua te a sik a, a hritlang em em a, ka message pawh a lo chhang thei lo a ni. Ka hmangaih ber khua a sik miau a, ka theihna zawng zawngin a tan ka tawngtai a, a khawsik chu a reh thuai theih nan tihtakzetin ka dil thin. Mahse ka hriat lohin a khawsik chu a lo dam tawh a, ka tawngtaisak chhung zawng zawng khan hlim takin tual a lo leng leh daih tawh a, ka tel lovin hlim em emin khawvelah hian a changtunu ber a lo ni leh tawh a lo ni. Tunah chuan a khua a sik tawh lo!
Ka muhil thei lo va, krismas lah chu a hnai tawh viau mai a, lehkha ka zir tui vang pawh ni lovin ka khua a har em avangin ka meng reng a, khua lah chu a vawt viau lehnghal a. Hamleta pa thlarau rawn lan dawn zan te pawh kha a ang thei dawn dawn hian ka hria a. Zan a lo rei deuh a, ka inzir tui ta deuh a, eng dang mah ngaihtuah lo chuan ka chhiar char char a, ka thil chhiar tawh chu ka hre chiang em tiin keimah leh keimah ka inzawt a, ka ngaihtuah leh veng veng thin a. Dy lah chu dam reng siin, tun tum chu a ngawi hlen ta a, a vawikhat ngawihna khan a vawihnihna a hring a, vawithum hman lovin hmanhmawh takin a liam ta a ni. Chutia ka note chhiar sa, ka rilrua ka sawi nawn leh lai tak chuan ring fahranin, "Ti ti ik ik..." 
Ka ngaithla a, ka ngawi reng a, ka thil chhiar lai erawhin ka rilru a luah lo va, hei chauh hi ka ngaihtuah, 'Ar a khuang leh ta.....!' Kan kawmchhak arpa chuan a khuan dan a la theihnghilh lo va, mahse ka lei lawmna par erawh chuan min theihnghilh ta a ni.