Tuesday, February 7, 2012

I liam ta si a!

Kum 25 ka tling tep tawh a, heng thute hian ka rilru an luah reng chu a ni si a!

Saviour School tih a intar kalh a, 'admission tih theih a ni' tih hian a bang hnuai lam chu a luah thung a. Ding meuhin ka en a, hmána in awmna thin hostel ngei kha zawng a la ni. A building chu a la ngai reng a, mahse a luahtute erawh an lo dang tawh a.

Kan thutna step kha ka va en ngat a. Chu erawh chu a nihna ang ang khan a lo la awm a. Ka ngaihtuah let ta mai mai a, kha zana dar hnih rik dawn thlenga ka khawhar min hnem tura min thutpui kha i lakah hian lawmthu sawi tur ka lo ngah hle mai. A hnu lawkah ngaihzawng kan nei ta ve ve a, i bialpa turin a bem lai che khan bialnu ka lo nei hman tlat tawh pek a! "Eng tin nge ni dawn?" tia min zawhna mitmenga ka chhan tur thil tam tak awm kha ka hmuh hmaih lo va, mahse ka chhang thei tlat lo che! Ngaihzawng ka lo nei hman atin ni! 

College-in hun hlimawm tak kan hman zan kha ka hre reng thin. Ka bula awm reng i duh a, kha tlangval khan a tibuai reng si che a, hrehawm ti tak leh ka laka inthlahrung taka ka thinrim hlau taka min enna hmel te kha ka mitthlaah hian a la lang nawn awn awn thin. Ka thiam lo em(?) tih zawhna hi a chhanna ka nei lo va, mahse ani nen khan in inngaizawng zui ta tih nangmah ngeiin min hrilh ta kha ania. Kha tah zet kha chuan kan pahniha inkarah khan thiam lo an awm a nih chuan keimah zawk ka ni tih ka pawm a, mahse kha thu min hrilh zan khan ka muhil thei reng reng lo.

Ka hriat hma chea i chanchin min hrilhtu ka thianpa khan a lo ngaizawng em em thin che a ni tih hi tun hnuah hian midangin min hrilh a, mak ka ti teh asin! Ani khan nang ka neih chuan ka vannei dawn a ni tih hi min hrilh fo thin a, keipawhin chu chu ka ringhlel lo. Kan inngaizawng ta si lo kha kei ai mahin ani khan pawi a tiin ka hre deuh thin. I lo fel em a, mi rilru dik leh tha i ni tih kha a lo hre chiang ve em a ni.

Hna i hmu ta a. I kal dawnah em kha chuan rawn thlah che kha engmahin min dal thei bik lo. Ka thiannu pawh engkim hrilhin ka rawn thlah che a. Ka thianpa khan kha mi zing khan hma takah min kai tho va, nang thlah tur khan kan lo kal a, tun hnu hian a rilru kha a hrehawm ve dawna hriatna ka nei thin a, a fakawm lehlingin ka hre thin. Kan rawn thlen hlimah kan hmu mai lo che a, mahse hmu lo chea haw leh reng reng kha kan tum lo. 

In kal a hun ta mai si a. Bus-a i lut tur kha hahthlak ti rilru takin ka thlir reng che a. Ka rilru hi eng tin emaw tak a awm a ni. I thutna turah i thu fel a, min thlah nan tiin chibai min buk ta a nih kha. I mitah ka en a, mahse nang chuan min en ngam lo va, lehlam hawiin i mittui i hru a! Ka hmu lo lui hram hram a, mahse i hmuhnawm ka ti. Mi an tam si a, kut han invawn reng kha thil theih a ni si lo va, i rilru tur kha ka dawnpui thiam lo che a, thil tam tak a awm ve ang tih chu ka ring thin.

I thiannu khan card te takte leh thil dang min pe a. Nangmah nena in lei a nih thu a sawi nghe nghe. In ka thlen veleh card chu ka hawng a, 'friendship card' a lo ni. Thu tawite i ziak a, mahse thu sei tak ang maiin vawiin thleng hian ka la chhiar thin. Ka tana a tha ber i hauh thu leh min ngaih ve thin turzia i sawina thu tlemte khan thu tam tak min hrilh a ni.

Rawn tlawh ve tur chein mi i phut fiam fo thin a, mahse i training chhung khan vawi khatmah ka rawn lang ta lo va, ka ngaihtuah nawn pawh hian i tan hian ka lo va tling lo em aw ka ti thin. In training i rawn zo va, ka rin phak miah lohvin min rawn tlawh leh a! Khata i thlalak min pek kha ka ngaihlu a, ka la dahtha a. Ka la en thin. 

Min mangtha lova mut i duh ngai lo va. Zan tin msg i rawn thawn ziah a, 'ka ngaih a tha' i tih thin kha ka la hre reng asin. Thian chauh kan ni a, mahse nang leh kei ang hi thian nihna ringawt hian min sawifiah zo kher lo hian ka hre thin. Min mangtha nan tiin i balance-ah cheng khat chauh a awm tawh chuan i dah tha thin tih i thiannu khan tun hnuah min hrilh a, ka ngai thin ngawt mai che.

I pasal neih dawn thu min rawn hrilh zan khan ka muhil miah lo. Chhuanlamah, "Min va hrilh tlai ve," kha ka ti ringawt a, "Ka hrilh mai ngam lo che a," i ti ve thung a nih kha. Kha zan khan tui taka mu turin duhsakna nen ka mangtha che a, kei erawh chu ka tlaivar zak a. A chhan ka hre lo, ka muhil thei reng reng lo.

I pasal neih ni tur min hrilh kha ka ngai pawimawh lo lui a. Mahse a dawn zanah msg i rawn thawn leh ta si a. Ka ngai pawimawh tur che a ni tih hi ka rilruah a awm reng a, chu chuan kal turin min tur a ni. Ka rawn kal ta ngei a, in inneihna tur Biak in kha ka hre chiang si lo va, innei tur dang an lo awm ve si avangin chutah chuan ka kal hmasa nghe nghe a! 

Mahse ka rawn zawng hmu leh ta thuai a. Inneih dar a lo ri zo tawh a. Kein hmanhmawh takin ka rawn kal a. Biak in bathlàr-a luh inpeih diama i ding kha ka rawn hmu ta thut che a! A chhan ka hre lo, min hmu ang tih ka hlau ta em em a, ka biru ta vel a!

Lehlam i hawi hlan chuan a sir lama luhna lam chu hmanhmawh zeta panin ka lut a. Inneih thutiam i chham lai te khan ngawi rengin ka lo thlir reng che a. Tlar hnung berah pawh a sirah, tu mah hmelhriat pawh nei lovin ka thu a. Ka bula thute khan min en leh hrek hrek thin. Pawnah khan min hmu ang tih hlau tak bawkin ka lo chhuak a, tum khat chu min hmu emaw ka ti hman hial a, mahse min hmu lo a nih ka ring ta. 

Thlalaknaah kham tel turin min duh viau na a, ka tihhlawhtlinsak thei ta lo che a ni. Zan tina min mangtha thintu kha i liam ta si a, mangthatu nei lova zan ka mut chang a tam ta hle mai.