Ka lo lang ve ngawt a, ka la liam ve ngawt mai bawk ang. Khawvel hi kan tel lo pawhin a hlimawm reng anga kan tel ve lohna hmunah nun tam tak chuan par a la chhuang leh thin ang. Kan lamtang leh kan unaute hi a chang chuan kan hmelma emaw an lo ni leh mai thin a, kan huat em emte pawh hian a sasehah chuan kan tan thahnem an ngai ve leh em em mai thin, a inthlak thleng kual mai mai thin a ni. Hriatthiamna hi pek kan ni a, mahse kan duh loh chang a awm a, kan hrethiam emaw kan intih tam tak erawh hi chu kan hrethiam lo a ni. Kei ve hi chu heti zawng hi ka ni mai. A bak chu sawi belh tur tam a awm lo. Ka thiam vang a ni lo tih ka hria a, a 'muse' a awm ve thin avang zawkin hla te pawh hi ka phuah ve ni berin ka hria. Keimah ngei pawh hian a then hi chu ka lungawi pui a, ka lunglen em em changin ka chhiar nawn fo thin. Min zawng la, min hmu lo a nih pawhin kal zel rawh, khawilai hmunah emaw chuan ka lo nghak reng ang che!
I lo haw nghakin!
Ka lo beisei thin kha a ral a nih paw'n,
Ka duhthusam thin erawh a ngai reng ang,
Lamtang ka nei lo a nih pawhin,
Ka beisei chu a chuai chuang lovang.
Chatuan hi ni khat a nih hun a awm a,
Ni khat pawh chatuan tluka rei a ni fo thin,
Beisei hi hunah ni lovin rinnaah a innghat a,
A nghaktu chu mi lungleng a ni!
Hmangaihtu damna lui chu,
Hmangaihte damnaah a luang a,
Hmangaih mawina chu vul fo se la,
A sirah lungawina sirva zai rawh se.
Na tura kan damna khawvel a reh a,
Nung tura kan thihna khawvel a ralin,
Hun neitu dar vaw ri a ring ang a,
Mihring hi eng tin awm ang i maw!
Tlan rawh min titu kiangah chuan,
Chawlhna hi kan ta a ni lova,
Min duhsaktu manganna chu,
Chhiar nawn fo tur lehkhabu a ni.
Ram hla taka in mawi chu,
A neitu tel lo chuan a ruak a,
A lo haw leh hma chuan,
Nghakhlelin a thlir reng thin ang.
Ka Hmangaih chu!
Hnim hling nei zingah a awm a,
A vul hun a thlenin dip a ni thin,
A kianga no taka chawrte chuan,
A hlimna zung an phawisak asin!
Khawvel tan mi pahnih a ni a,
Ka tan erawh chuan mi pakhat a ni,
Nuihsan leh kalsan a ni thin a,
A nghaktu nih erawh ka zak lo ve!
Thlaler pangpar ang mai a ni a,
Mawi takin a vul thin a,
Tuihna awm lohna kianga
Nun tuihna a ni fo thin.
Ka hmangaih a ni!
A chhan leh vangah ka buai lo va,
Hriatthiamna chu tap mah se,
Endawngtute sumtualah ka tlu lo vang.
Ka hmangaih a ni!
Beidawnna chu hnehtu a nih a,
Manganna thlipuiin min nuai hunin,
Nghet takin min vuan thin.
Pangpar zinga pangpar a ni a,
Zing daifim a tlak loh va,
Kawngsira hnawl a nih pawhin,
Ka tan chuan pangpar zinga pangpar a ni!
Hraitè i pu hi!
Hraite tho rawh a tlai tawh,
I pu sawi thin tlangah khan i va kal ang,
Tlang leh lui inkara thing leh maute,
An siamtu tan an vul leh saw.
Kan pahnihin kha luikamah khan,
Vaivut chungah thli va ni ila,
Lungkham kha leilung ni lovin,
Thlipuiah zawk a awm va ti ang!
Kan hlim puia kan phu si loh
Kha i nutei khawvel kha maw,
A vul laia a mawi tehlul nen,
Niminah khan a chuai an ti asin!
A neitu kan nihna khawvel a,
Chak taka kan tlan thinna kawngah khan,
Ti rawh zawi muangin i kal tawh ang,
I tluk loh nan ka kai dawn che nia.
Phul pangpar va ni ila,
Tlai nèma lengi leh vala ten,
Vanglai chena hlimni an chhaih hunin,
Mawi takin kan vul thin dawn nia.
Pathianni a lo thleng a,
Thawhtan pawh a lo thleng leh ang,
Kan tan naktuk khi vawiin ni reng se la,
Chhawrpial run i lawi thin ang aw.
Beiseina
He leiah hian mi tam tak an liam tawh a,
Beiseina kulhpuite chu a chim a;
Innghahna lungpui chu a kehchhia a,
Famkim lohna tihfamkimna a ni.
I pu hi han en teh mah,
Phul pangpar zinga hling a ni a;
Neitu a nei lo a ni maithei,
Hmangaihtu vul thin erawh a hlu a ti.
Neih loh thila lungawi a lo hun a,
Hnehtu hnehna chu lak bo a nih a;
Chakna chu chak lohna kianga a zàlin,
Hmangaihna hming an chhal thin.
Hriatthiamna hi vul ni se la,
Inthenna hi saltang a ni ang a;
Hnawl leh hnar a kiang ang a,
A thunawn hmangaihna a ni thin ang.
Indona mualah phun kan ni a,
Kan chhandamna lungpui a khi a;
Kan hmangaihte an liam zo va,
Zalenna chu rahbeh a ni thin.
Thlipui tleh kara thlifim thaw chu,
A hretu tan a ngaihnawm bik a;
A hmutu tan muanna a ni a,
Harsatna kara hlimna a hlu thin.
I pu hian i pi a nei a,
Kham kara vul thin ngei kha;
I tel lovin zing zin an tan ngei ang a,
Lo thlaphang hauh suh ang che.
Nipui a ral a, thlasik a lo thlenin,
Kan lenna luikam cham del atangin;
Sirva iang kan leng leh ang a,
Satel lem kan lo hawn ang che!
Kan hloh tawh nun chahbi ngei kha,
A neitu kan ni leh tawh ang a;
Nun perhkhuang zai ri chu,
Kan lemlawi a ni kumkhua tawh ang!
Chutih hunah chuan maw hraite,
Ni khat hi a tawi kan la ti ang a;
Muang kan tih thin nun sana hi,
Kan duh aiin a la kal chak ang!
Ka hriat loh tu emaw tan!
He rûn khawhar hi lo nghak la,
Kir leh tawh ngai lo tura ka kir ta a nih paw'n,
Zangkhua a la bungbu ang tih hre reng la,
Harsatna thlipui a tleh a ni tih theihnghilh suh!
Riah run a vai a nih paw'n,
A lungawi em em tho va,
Thlanthlá chu a hlim em em a,
A thlawk reng thin tih hria ang che.
Fanghmir zinkawng ka hre lo va,
Thlifim hi ka siam thiam hek lo,
Manganna hi a neitu ka hre lo va,
Ka tan khawvel hi chhingkhual a ni!
I pu chu a lungawi em em thin a,
I pi nen thangvan an kai asin,
I pu hi mihring pakhat ve mai a ni a,
I pi chu a ngaihnawm em em thin!
Khawhar taka nun hi a nuam a,
Harsatnate hi a lunglenthlak a ni!
Mahni chauha zanlai hmachhawn hi maw,
Min hmangaihtute ên hun ania ´sin!
Hmangaihna hla sa rawh min ti thin a!
Eng hla nge chu chu ka hre mai lo va,
Ka sa dawn anih chuan maw hraite,
I pi hmangaihna hla mawi ka sa ang!
Ba kho kianga tap vut nena insual thin,
I pu hi min ngai thin ang tiraw?
Ka lunglen chang leh tihnat ka nih lai khan,
Ka kiangah nang chauh i awm thin si a!
Hnutchhiah tur che engmah ka nei lo,
Keimahin ka lo piang ve ngawt a,
Khawvel hi a phurawm tehlul nen,
Keimah chauh bawkin ka zâl leh dawn a nih hi!
Phenglawng rimawi ri vawng vawng te,
Tingtang zai ri i ngaihthlak hun te,
Mawi em ema April a par hun te chuan,
Nun hi ka hlimpui thin tih lo hre thin ang che!
Eng tin nge ni ang?
Vawiinah chuan kan hlim em em a,
Naktuk kan ngaihtuah ngai lo,
Kan beisei aia hmain naktuk a lo thleng ang a,
Kan inrin hmain khawvel kan hmachhawn a la tul ang,
Chu tih hunah chuan eng tin nge ni ang?
Naktuk a lo thleng dawn tih chu kan hria a,
Mahse chu mi atan chuan kan inpeih si lo,
Vawiin hi chu nimin a la ni leh mai ang a,
Kan inhmangaihna hi thawnthu a la ni ang a,
Naktuk a lo thlen hunah eng tin nge ni ang?
Khawvel hi kan lo hmachhawn tawh thin a,
A hmachhawn dan kan la thiam chuang si lo
Naktuk atan mei eng kan chhi ngai lo va,
Khawvar ar khuang a reh thlengin kan mu ang a,
Kawl a lo eng thut anga eng tin nge ni ang?
Nghet takin min vuan la ka tih khan,
Naktuk leh chatuan ka sawi tel asin,
Mahse naktuk a lo thlen hun chuan,
Chatuan chu hunin a hril ang kan ti leh si,
Khawiah chuan nge hmangaihna chu a awm?
Hun chu nghakin naktuk chu kan thlir a,
Hringnun kawng kawiah nuihsan kan ni a,
Mal leh khawhar reng rengin kan hlim dun a,
Mahse naktuk atan kan inphal ngai si lo,
Hmangaihna hi beiseina kiangah a zâl em ni?
A zâl an ti!
Zan thla eng a liam a,
Nun ram reh a intan leh ta,
Rauthla leng mah a vai a,
Zanlai au aw a ring an ti.
Vawiin thawnthu a liam a,
Naktuk khawhar a intan leh ta,
Bawar zai ri a reh a,
Vangkhaw zau a riang an ti.
Zan khawhar min tiam a,
Nun ngaihnawm a intan leh ta,
Phenglawng rimawi a chuai a,
Rairah riang a zâl an ti.
I lo haw si lo!
Chu hmunah chuan
Sinte par a vul a,
Nun hi daihlim hnuaiah a chawl a,
Mahse i awm si lo.
Chungleng sirva zai a ring bik a,
Hnah nem an thle lep lep a,
Lianâk a lo paú va,
Mahse i awm si lo.
Hlim takin i liam a,
I nui hmel i liam pui a,
Turni thangvan a lo kai a,
Mahse i awm si lo!
Losul an haw asin Didi,
Ni khat hi a rei ka ti,
Nilengin ka nghak che a,
Mahse i lo haw si lo!
Min zaltir ang che.
Ka beisei a tawp a, ka engkim a liam a,
Ka innghahna a bo va, ka damna a thihin,
Nghet takin min kuah ang che.
Ka hlimna a lungngaih a,
Ka hahdamna a mangan hunin,
Nget takin min vuan ang che.
Ka nui ri a tah a,
Ka chawlhna hlìm a sat hunin,
I hlimah min chawlhtir ang che.
Ka nunkhua a ngui a,
Ka hringnun a chauhin,
I kiangah min zal tir ang che.
Kan ta an ni lo!
Ka lenna ram hnuchhawna ka liam hun a lo thlen chuan,
I kiangah khan ka zál a, ka hlim a, ka hahdam thin tih hria la,
Ka lo haw tawh dawn loh avang mai hian
Ka theihnghilh ta che tihna a ni lo.
Khang kan hlimni kha a rei leh rei lohah teh ka duh lo va,
Ka tan chuan mit khap kar pawh kha an hlu vek a,
Ka hriatrengna hian a theihnghilh tawh kher lo vang.
Chu chu i tana ka hlutna a nih erawh ka ring lo.
Zingah mawi taka ni a lo chhuak ta lo a nih pawhin,
Hei hi hre reng rawh aw, naktuk dang a la awm tih hi.
I chau thin tih ka hria a, ka dem lo che,
Mahse tho rawh, i kiangah ka awm reng dawn alawm.
Thla en zana ui bengchheng ri i hre thin tiraw,
Thla mang zanah chuan ngawi rengin an bauh thin!
Nun hi i tan a ni, mahse tlansan tur a ni lo,
Hmachhawn tura siam a ni asin.
Hmangaihna i sawi thin tiraw?
A fiah loh vang ringawta hnualsuattu chu i ni lo,
I hrethiam lo va, i nuihpui a, i tahpui thin a ni lawm ni,
I nun pui hunah chu thil chu a la fiah tulh tulh thin ang.
Engmah pek tur che ka nei lo ka tih thin kha,
Ka sawi tirh lai ang tho kha ka la ni!
Ka hre reng ang che,
Arsi te, van boruak mawi em em te,
Zanah i thlir a, a mawi i ti thin tiraw,
Tui a far koh koh a, a ngaihnawm thin,
Kan ta an nih theih loh vang a ni!
Ka ngai!
Ka va ngai reuh em!
A hlim a, a nui thin a,
A thinrim a, min hau va,
A lo lang a, a biru leh a!
Ka va ngai thin em!
A hlimawm a, a nuar a,
A tap a, thu a sawi a,
A nui leh ringawt a!
Ka va ngai tak em!
Tho rawh min tia,
Ka nuar a, a nui a,
Tho mai la a ti leh a!
Ka va ngai tehlul em!
Khawvel a sawi a,
Coffee a in a,
Nun min hrilh thin asin.
Hringnun
Hriatrengna chauh hnutchhiah ka ni a,
Hmangaihna chu hnawmhneah ngaih a ni a,
Thawnthu chu hrilh ka ni a,
Ka hriat loh ka hria a,
Ka nihna ang hian hnawl ka ni.
Chhimbuk muhil a harh a,
Thotle chu nuihsan a ni a,
Fanghmir erawh a buai,
Khawvelah hian a buai a ni,
Tihtur tam tak a nei si a.
Naupang chu vuak a ni a,
Tuihawk luanin a luang a,
A hlimna chhuhsak a ni a,
A chawlhna chu an hnawl,
An tehna a dik loh avangin.
Nun hi chu a la ral ang,
Hlimni leh nuihni zawng nen,
Din kan nihna khawvelah
Hnawl leh hnar kan ni thin,
Chu chu a ni mihring nun hi.
A vul ngai si lo!
Natna hi ka ta a ni ka ti thin a,
Nat dan ka thiam si lo.
Manganna hi ka ta a ni tih ka hria a,
Mangan ka thiam si lo!
Lungawina hi a hlu a ni ka ti thin a,
Ka lungawi ngai si lo.
Chawlhna hi i kiangah a awm tih ka hria a,
Ka chawl ngai si lo!
Phul pangpar hi a mawi a ni ka ti thin a,
Ka tan an par ngai si lo.
April par hi a mawi a ni ka ti thin a,
Ka tan a vul ngai si lo!
I haw ang!
Hraite ti rawh i haw ang,
Khawvel hi a hlimawm em mai,
Nang leh kei hian kan phu lo,
Kan inah khan i haw ang!
Chemte ti rawh i haw ang,
Khawvel hi a phurawm em mai,
Nang leh kei hian kan inhmeh ve lo,
Kan inah khan i haw ang!
Naute tirawh i haw ang,
Nun kawlkei a hrang em mai,
Nang leh kei hi engmah kan ni lo,
Kan inah khan i haw ang!
Hraite ti rawh i haw ang,
Chhaka ni chhuak a sa em mai,
Nang leh kei hi dâwt bak kan ni lo,
Kan inah khan i haw ang!
Chemte ti rawh i haw ang,
Thlifim kha thlipui a iang em mai,
Nang leh kei hi kan ropui ve lo,
Kan inah khan i haw ang!
Naute ti rawh i haw ang,
Khawvel hian neitu a nei em mai,
Nang leh kei hi kan tel ve an duh lo,
Kan inah khan i haw ang!
Hraite ti rawh i haw ang,
Chhimbalah sâr a zâm em mai,
Nag keh kei hi lui pui kan ni lo,
Kan inah khan i haw ang!
Chemte ti rawh i haw ang,
April kungah May a par em mai,
Nang leh kei hi hriatthiam kan ni lo,
Kan inah khan i haw ang!
Naute ti rawh i haw thuai ang,
Kan in kha a mawi em mai,
Nang leh kei hi khawvel kan ni lo,
Kan inah khan i haw ang!
Chu luikamah chuan!
Zingah ni a chhuak hma bik a,
Chhun hi a hlimawm thin a,
Tukchhuakin nun i zir fo va,
Hlim takin i haw leh thin.
Neih loh tam tak i nei a,
Mahse i thil neih chu i en a,
I ropui fahran lo tih i hria a,
I lung a awi tho thin a nih kha.
I nupui chu i lungawi pui a,
I hmangaih em em a,
I fate pathum chu an va hlim em!
An vaiin i hmangaih tih an hre si a!
Tlai a lo thleng a,
Kha luikamah khan kalin,
Thawnthu in inziahsiak thin a,
Tu dang in ngaih ngai loh kha!
In tan khawvel hi a eng reih a,
Mawi ti takin in thlir za a,
Luikama in chu in ta a ni tih inhria a,
Eitur in neia in va lungawi thin em!
Ropuina hi a neitu nih i tum ngai lo va,
Mahse ropuina fahrin chu i va ni si em!
I thai kiangah chawl turin i haw ziah a,
I hmangaihte chu an va mawi thin em!
En teh mah lenkawl saw,
Mawi takin a eng dul leh ruih asin,
I awm ve tawh si lo va,
Ka va ngai thin che em!
Nun leilawn!
Hmangaih aw nêm a chuai zo va,
Hlimna dar ri a reh zo ta em ni?
Hnehna laltiang a tliak zo va,
Hmangaihna a ràwng em ni?
Nun khawhar hnemtu a liam a,
Hnemtu lal duhawm a chau em ni?
Sirva zai mawi an liam zo va,
Zan khawhar a intan ta em ni?
Kir lo turin a liam vawng vawng a,
Hmangaihna hming an chhál em ni?
Nun lehkhabu chu thaichhiat a ni a,
A thar ziak tur an awm lo em ni?
Hringnun zinkawng a dang zo va,
Chhuah tlangah chuailopar a vul em ni?
Hnehtu hmangaihna a chuai zo va,
Nun pangpar a tliak ta em ni?
Ngaidamtu thinlung a keh zo va,
Hmangaihtu a nuar em ni?
Hlimna chu phuar a ni zo va,
A neitu an awm lo vem ni?
Hmangaihna chu chawl rih se la,
Lui luang lai chu ding rawh se,
A sûn na'n lelte i aw chhuah la,
Hringchan khuavel hi ngawi rawh se!
Hmangaih Nunnem lo haw tawh rawh!
Puallénga cho lai Dì,
Ngawi rengin i kal bo va,
Ngawi rengin i liam ta.
I thliah atan vulmawi ka rawn hawn che a,
Sirah hnawlin tlángsàm par i thliak a,
I tan thuro nunnem a ràwng em ni?
Hmangaih Nunnem lo haw tawh rawh,
Zing khua a lo var leh ang a,
Thlehnem laikhum tuala'n,
Ka ngai leh dawn che 'sin,
Ka tana par thin Violet vulmáwi,
A nuar em ni ka chuailopár,
Pualchang hmul iang min thlau a,
Thlanthlá Peuleu a riang leh ta,
Hmangaih Nunnem lo haw tawh rawh!
Ka hmangaih!
Ka hmangaih,
Ka damna i ni a,
Ka natna pawh i ni.
Ka hmangaih,
Ka hlimna i ni a,
Ka lungngaihna pawh i ni.
Ka hmangaih,
Ka chak lohna i ni a,
Ka chakna pawh i ni.
Ka hmangaih,
Ka lawmna i ni a,
Ka thinrimna pawh i ni.
Ka hmangaih,
Ka khawvel i ni a,
Ka thlankhur pawh i ni.
Ka hmangaih,
Ka engkim i ni a,
Ka manganna pawh i ni.
Ka hmangaih,
Ka pangpar i ni a,
Ka tahna pawh i ni!
A hmasa bera kalin a hnung berah i haw thin a.
(Tu emaw tan ka dedicate e)
Chhaka´n tur ni nêm hlim ni a chhuak a,
Hmangaih hrai chawnbán nem vuana kaiin,
Laitual mawiin sum tual kan vèl thin a,
Sinte par iang lei nun a vul leh thin.
Leng dang ngaiin tu dang kan ngai lo va,
Chhim thlipui hrang tui ang a nêm leh thin,
Zua leh hrai khuavel a lo mawi zual a,
Zan mu chhingin thlehnem kan bel leh thin.
Khuavel chhinga zing thla kan zàr lai a,
Thlang lenkâwl tlai ni a lo ngui laiin,
Cho loh leng kaitu’n zua ban a kai a,
Hrai chawi leng chunnu thin lai a zing thin.
Kâwlah nuih leh lawm lai ni a liam a,
Chhungkim lam dar riahrun kan rem laiin,
Damna run sang kaiin thlang kan liam a,
Thlang tiangah i hrai riang a vai leh thin.
An sawi zawl khawpui zau hnutiang chhawnin,
Thlang zamual liamin nun kan beisei a,
Damna run bel thenna kawl a enin,
I hlim nui hmelin min mangtha fo va.
Hmangaih zuapa i kiangah ka zâl fo va,
I tel lo chuan tlai ni leng zo lo vin,
Run sáng kai zai ka rel ngàm ngai loh kha,
I tel lo zawngin ka nung zo lo ´sin.
Ngawi rengin thawnthu i sawi fo thin a,
A ngaihnawm dan a la ngai reng asin,
Tunah ka tel lovin i zâl ta si a,
Laikhum thlehnema’n ka zawng che ´sin
Ka tel lo chhingkhual chan i zuam lai a,
Hmar thlipui hrangvung a lo hrànin,
Kan ziah kha nun thawnthu ngaihnawm zawng kha,
Chhing mitthlaa’n a lo thar nawn leh thin!
Lo kir leh tawh ngai lo tura kir ta,
Piallei dai nghaka nun riah run rem thin,
Phul pangpar zinga min ngak thintu kha,
Sangparah vul ni nghakin ka thlir thin.
Piallei lo ngawiin lo chawl rih ta la,
Luipui luang te u chawl hahdam rawh u,
Nun zarpui a tliak asin lei lawmna,
A sûnin hla mawi min sakpui rawh u.
Tah Mittui!
I tah mittui ka nih loh pawhin,
I hlim nui hmel min nihtir la,
I nun thawnthu ka nih loh pawhin,
A ziaktu min nihtir ang che.
Ka tel ve lohna hmuna i lungngaih hunin,
Ka hmangaih che tih hre reng la,
I phu tawk hlimna ka nei lo a nih pawhin,
Ka neih chhun hmangaihna ka pe ang che.
I tan damna ka nih loh pawhin,
Ka damna i nih tih hre reng la,
Ka aw i hriat loh hun pawhin,
I ta ka ni tih theihnghilh suh ang che.
I hmangaih ka ni lo a nih pawhin,
Ka hmangaih che tih hre reng la,
I khawvel a reh a, i nui ri a ralin,
Ka tah mittui i ni tih hre reng ang che.
Leng dun ila!
Tlai khua lo nguiin sum tual ka vèl a,
Thlang lenkâwl lo nguiin run sáng ka kaí a,
I ngai hian nau ang ka nuar leh a,
I tel lovin riahrun ka rem leh ta.
Kan beidawnna khawvel kha a lo vul leh a,
Kan tahna lenbuangah lunglen a kiu a,
Nang ngaiin chhing mittui a lo far a,
Rual zawng laiah ka riang leh ta.
Kan damna lui kiangah thangvan ka kaí a,
Sirva iang i lenna tlang ka chuan a,
Vulmawi pangpar i lo vul ngei a,
Ka tan lei nun a kim leh ta.
Si-ar hmingthang vangkhua leng dun ila,
Nunhlui tham hnu hnutiang chhawna
Hlim zai vawra hlimni chenin,
Leng dun ila indi bang lovin.
A ngaìhnawm kher mai, hun a heh tih mai loh chu. Blog tha tak a ni.
ReplyDelete