Amah chu sang tura duan ni lo, inkhai thli tihtur pawh ni chuang lo. Mi pakhat, amah ang awm lo, ni e, mi pakhat a ni ve tawp mai. Chu chuan nun hi kha leh chenah khan 'chhuk leh chho' min lo tihpui tawh a. He huangah hian cheng ve turin ka han thliak ve dawn a ni.
Kan kawmthlanga hlobet a par thin lai khan hnahkiah a par ve tih kan hre lo va. Kâwldai par hi khuai chhummu-in a zû a dâwt thin tih pawh kan hre lo! Mahse, he khawvel pawh hi awmlo ata awmah a siamtu khan a lo siam tawh a. A awm lohna, keima khawvelah khan, kha leh chen kha lungawi takin ka lo nui tawh tih sawi hi a awm tih ka hriat hnu hian ka ui thar leh thin a nih chu!
He khawvelah hian mifel hi mi tam tak, chhiar sen loh an awm ang tih ka ring. Mahse, an hlutna te, an thatna te, an hawihhawmna te, an rinawmna te zawng zawng chu hmun hla taka awm tan chuan a chanve buklung ai pawhin a zàng zawkin ka hria. Hetiang zâwnga ka ngaihtuah lai hian ka kianga hahchawlhna awm hi a hlu zualin ka hre thin. Mi dang zawng zawng pawh chu fel reng se, rinawm reng se, hlu reng rawh se.
Hla takah a awm a, mahse a kiangah ka nileng thin! Tih tur hi a ti thin a, tih loh tur hi chu mi dang nunah a nem bel a. He hringnun zinkawngah hian a tlan chak lo a nih pawhin a ruala tlan hi ka zak lo va, a khalhtu ni dawn lo pawh ni ila, a bula ka thut chhung chuan tiam chin lam chu phur takin ka pan thei ang.
Ka pu zára ka pi te chu an driver hruaiin khawi khawiah emaw lengin, an awmpui nula te chu an pot pakhat tluk pawhin ngai lo mah se, an anthurium tluk tala an ngaih an driver chu khawi hmunah pawh a pâr tho thin! Intluk tlan lohna khawvela chapona ruamah ka muanna thing thiang chu amah chauh hi a ni a, ka pu khawvela a pendrive pakhat tluk chauh tala ka pawimawh theih nana a laptop ka khai lai pawhin khûtah awmin khîtah min mut-tir thin!
Lawnglêng chu a kartu thunun ang angin a kal thin a. He ka hringnunah hian ka nun hi lawnglêng ang a ni hian ka hre thin. Kar ka ngai a, he tuifinriatah hian khawi lam hi nge Lungrang ni a, khawi lam hi nge Kawrthah pawh hre lo va, 'a lu nung' an tih ang chauh ka nih cháng a awm tih ka hria. Chu tih hunah chuan nghet taka ka bula dingin, ka banah min kai a, pastor-te kawngah ka kal duh lo tih hriain mi pangngai kawngah chuan min hruai thin a, ka pa khawvela ka nu kiangah min thlen thin. Ka nun khalhtu atan amah hi ka lo thlang lovang tih hlauvin chhimbuk takngial pawh an mutthlûk lûp lûp tawh thlengin ka vanneih zia ka ngaihtuah a. Pathian hnenah lawmthu ka sawi thin.
Ka hahdam thin. Mahni chauh pawha hahdam hi he mihring nunah hian thil har tak a niin ka hria. A vannei ber chu ka ni lo maithei! Mahse, ka hahdam ni a ka inhriat ve lai nî hi a ral hma ngei hian nangmah avangin ka hahdam thin tih hi ka sawi nawn fo duh e Lalmampui.
Ka kianga i awm hian ka hahdam thin!
Tho thlâwk man thei lovin,
Chawngzawng ke pen tiding thei lo mah ila,
Hlutna chhete tal ka nei tih ka hre thar leh thin.
