Mahni veng chhuahsana hmun danga awm ta chu haw hi a ngai ve leh thin a! Ka awm loh chhunga ka blog lo nghaktu atan heng thu fahrah angreng tak tak hi ka han thaikawi ve leh poh ang e!
Ka haw dawn!
A duh duh leh a phur phur tan 'ka haw dawn' a tih ngawt theih loh! Mahni ina haw na tur nei lo, vak rawlai a, then vel mai mai hi mi tam tak an awm ang. Haw na tur 'Inpui' nei lo hi he mizoramah pawh hian mi tam tak kan awm ang ka ring. Mi inhnuai luaha hringnun chhiar tawp ta, thinlung leh ngaihngam taka haw na tur nei lo, kotu kohna chhang ta an awm teuh ka ring. Mi inluah nih chuan, engtik hunah pawh min hnawtchhuak thei a, bangrel pakhat leh floor tile pakhat lek pawh hi kan ta a awm lo! Haw na tur in hrim hrim pawh nei lo, home vela january thla atanga december thlenga hringnun chhiar ve thin, midang an haw sup sup lai pawh a, han mitthla tur haw na reng reng nei ve lo pawh an awm ka ring, an tan room pakhat, pek an nih avanga an awmna chu an chawlhna a ni, mi dang tam tak nen chu hmun chu an in anga an ngaih, ni si lo, an in han tihsak loh theih ni bawk si lo a ni! Lalpa, i khawvel siam hi rethei tan chuan haw na tur hmun pawh awm lohna a ni asin! Kei chuan haw na tur ka la nei ve a, a that leh that lohah ka buai lo, 'ka haw dawn' ka la ti thei...min siamtu hi ka tan hian a tha bik chu ka ti ngam lo, mahse min hruai thina ka hriat avang hian ka lawm thin.
Ka tling lo!
Sawi awm a ni em ka hre lo! MA (Mizo) ka exam zo deuh chauh a, thiante'n M.phil ti leh rawh min tih avangin ka tum em em vang pawh ni lovin ka ti ve leh a. Vawiin (ni 12 july) hian result a chhuak a, a tlinglo langsar ber ka niin ka hria! Written ka titha lutuk lo va, mahse midang pawh an tih that lutuk loh avangin a ngaihdam theih. Interview niminah kan nei a, zawhna harsa min zawt lem lo. Ka tlakchhan ni awm bera ka rin chu, 'english paper-ah hian mark i hmu tlem ber ziah mai, engatinge?' tia kan professor-in min zawhna kha a nih ka ring! Tlang takin ka weakness a ni tih ka hrilh mai a. Ka han sawi chhuah chhan erawh chu, ka background a ni, retheih hi a lo pawi ngawt mai! Ka pain kan venga school ka kal laiin ka thiam thei ve deuh tih a hria a, mi ina awm turin khawpuiah min hruai a, high school atangin Lungleiah ka awm a. Mahse ka awmna venga school-ah chuan ka lut ve tawp a, kan venga pawl sarih thleng ka kal lai khan, chowkidar kal tlai mai mai avanga chhuti kan ngah a, english phei chu ka thiam lo takzet, mahse grammar thiam lo pawh khan ka by-heart thei a ka titha viau zel! Class VIII ka han ni chho a, english-ah workbook kan zir tan ta, pakhatna te ni ve thin kha, english subject avangin ka simple pass ta reng mai a ni! Kan zirtirtute kha phaia zir chhuak an ni a(english bikah), mahse ka man lo a ni awm e, vanneihthlak takin matric erawh second-ah ka pass hlauh. Tichuan, a tawi zawngin sawi ila, ka kal chho ve zel a, english chu ka thiam lo ta reng a ni, a bul thut a fuh loh hi chuan a lo har tawh khawpin ka hria. Ka phák tawkin han zir vein lehkhabu te han lei thin mah ila, tun thleng hian keimah pawh hi ka la insit thin. Ka pain a sawi ka hriatreng chu, "Serkawn school-ah te khan lo han kal ve la a tha tur, mahse ka mitthla phak lo reng reng, Lungleiah i awm kha ka mitthla theih chin tawk a ni," a ti thin. Ka dem lo ka pa hi chu, ka chhuang em em zawk, kan dinhmun a nih vang chauhva sawi ka ni. Tichuan BA ah chuan Mizo hons. ka la a, Aizawl College atangin topper hial ka ni ve, Pathian vang liau liau a niin ka hria. Tichuan, MA ka zawm a, a titha pawl chu ka ni ve thin, M.phil kan han interview ta a, english ka thiam tawk lo chu a pawi ta hle mai a ni. M.phil han zira research han ti tak tak tur chuan english thiam tak an duh a nih ka ring, MA(english) pakhatin a rawn dil a, ani chu an la! Ka thiam lo tih hi ka pha hran lo, mahse zir ta ila ka tihtheih ka ring, tha takin ka zo theiin ka ring. Ka english thiam tawk loh chu an hre chiang ve khawp mai, min zawt ta chat a, thudik ka sawi mai a, ka thiam hran lo tih ka hrilh mai. Mahse a phena kan harsat avanga sikul thaa kal ve thei lo, harsa taka lo inzir chho ve hram hram ka nih kha sawi tel a rem ve tawh lo va, excuse a lo tling reng reng tawh lo! Retheihna hian min lo hrual ve tawh a, chuvang chuan english thiam tak ka ni ve thei ta rih lo va, ka tlak phah ta a ni berin ka hria! Retheih hi a lo pawi em mai, ka vui hran lo va, mahse ka tling lo a ni tih erawh ka pawm thlap a ngai!
Dar ri!
Mihringte hian kan damchhungin kan pualin vawihnih dar kan tiri thei tih hi kan ngaihtuah ngai em? Mizo danah chuan kan thih niin dar vuak a ni thin a, chumi lova dar kan tihrik leh theih hun chu nupui pasal Biak In hawnga kan neihin a ni. Napoleon-a kha Alps tlangdungah indo tura a kal laiin hmun hla taka dar ri a hria a, a sipaite nen ngawi rengin chu dar ri ngaithla chuan an ding nghe nghe a ni. Dar ri hrim hrim hian mihringteah hian eng emaw ti takin awmzia a nei a ni awm e! Tunlai khawvelah hian an puala dar ri ve reng reng lova mual liam ta an awm ta nual mai. Nupui pasal nei lem lo, nun tla dah ve tak tak, nimin leh vawiin chauh pawh ngaihtuah thei lova hun hmang, ruihhloin a tihhlum tam tak an awm a, haw na tur chu sawi loh an ruang takngial hlawmtu pawh hmu zo lo, an puala dar vawikhatmah vuak ni lo te pawh an awm! Riangvaite thlanmual ka hmuh hian an pualin ka tawngtai ve ringawt thin! Vawikhat an lo piang ve a, Lalpa, heti ringawta i tawptir thin hi a pamhmai ka ti thin! Ka pual hian vawi engzat nge dar hi ri dawn ka hre lo va, vawikhat tal zawng ri se ka va duh em. Nang, vawi eng zat nge tih rik ve i tum le?
